(हो निबंद विद्यार्थ्यां खातीर फकत एक नमुनो. हो निबंद तश्या तसो घेवचो न्हय.)

5 जून हो दीस संवसारीक पर्यावरण म्हूण मनयतात. पर्यावरणा विशीं जागृताय घडोवपाक आनी पर्यावरणाचें रक्षण तशेंच संवर्धन करपाक हो दीस मनयतात. संयुक्त राष्ट्रसंघाच्या जनरल असेम्बलीन 1972च्या स्टॉकहोमच्या पर्यावरण विशींचे परिशदे वेळार 5 जून हो दीस पर्यावरण दीस म्हूण जाहीर केला.

दर वर्सा वेगवेगळ्या संकल्पनांच्या आदाराचेर हो दीस मनयतात. संवसारीक पर्यावरण दिसा निमतान सरकारी पातळीचेर कार्यावळी आयोजीत जातात. ते भायर साबार बिगर सरकारी संस्था, शिक्षणीक संस्था तशेंच हेर संस्था वेगवेगळ्यो कार्यावळी आयोजीत करतात. भारतांतूच न्हय तर संवसारांतल्या साबार देशांनी हो दीस मनयतात. ह्या दिसा निमतान झाडां लावपाची कार्यावळ, नितळसाण मोहीस, जागृताय कार्यावळी जातात. शाळांनी आनी महाविद्यालयांनी विद्यार्थ्यां मदीं जागृताय घडोवपाक पोस्टर तयार करप, निबंद लेखन आनी हेर सर्ती आयोजीत करतात. ह्या सर्तींनी कितलेशेच विद्यार्थी वांटेकार जातात. शारांनी आनी गांवांनी लेगीत नगरपालिका आनी पंचायत पांवड्यार कार्यावळी आनी सर्ती आयोजीत करतात.

पर्यावरण म्हणल्यार Environment हो मूळ फ्रँच शब्द Environ ह्या शब्दांतल्यान तयार जाला म्हणल्यार Surrounding वा सरभोंवतण. सजीव तशेंच निर्जीव हांच्या मदल्या क्रिया आनी प्रतिक्रिया तशेंच आंतर क्रियेंतल्यान निर्माण जाल्ल्या सजिवाच्या सरभोंवतणची परिस्थिती म्हणल्यार पर्यावरण. पर्यावरणाची गुणवत्ता वाडोवप, पर्यावरणाची समस्या सोडोवप, पर्यावरणाचें रक्षण करप आनी संवर्धन करप असो संदेश ह्या दिसा दितात. झाडां-पेडां, रानां, रानांनी रावपी जनावरां हे सगले पर्यावरणाचो भाग आसात. तांचें रक्षण केल्यार पर्यावरणाचो सांबाळ जातलो.

पयल्या म्हाझुजाचो पर्यावरणाचेर भयंकर परिणाम जालो. तशेंच उद्देगीक क्रांतीचोय पर्यावरणाचेर खूब वायट परिणाम जालो. उद्देगांक लागून उदक आनी हवा प्रदुशीत जावपाक लागलीं. ते खातीर पर्यावरणशास्त्रज्ञ पर्यावरणाचो स्वतंत्रपणान अभ्यास करपाक लागले आनी तेन्नाच्यान पर्यावरणाचो सांबाळ करपाक खास पावलां उबारूंक लागले.

मनीस होय पर्यावरणाचोच भाग आसा. मनीस हो सामको बुद्दीमान सजीव प्राणी. म्हणून मनीस लेगीत पर्यावरणाचेर निंबून आसा. पर्यावरण नश्ट जावपाक मनीस सगल्यांत चड जापसालदार आसा. प्रदुशण, उदरगती खातीर झाडां मारप आनी हेर कारणांक लागून पर्यावरणाचो समतोल इबाडटा. पूण पर्यावरण ना जाल्यार मनीसय आसचो ना, हें आमी विसरूंक जायना. पर्यावरण सांबाळूंक दरेकल्यान यत्न करूंक जाय. दरेकल्यान झाडां लावपाची जापसालदारकी घेवपाक जाय. ह्या पर्यावरण दिसा, पर्यावरणाचें रक्षण करपाचो सोपूत आमी घेवया.

#Environment #Day #Conserve #Forest #Essay #Goa #Educational