आग्गो लिलू हांगा यो गो
हाका पळय
ना तरी च्याचो मात्सो
उजो पळय
बायचो पापा येवचो जाला
पोटा भुकेन
जेवण अजून जालें ना गो
बायच्या त्रासान.
Contributed by Usha Kamat
बाळ बरो पणसा गरो
गोरो आंगान
बाळाचें नाक छान
सुंदर कान, बरो रुपान.
Contributed by Usha Kamat
बाळ गुणी मोतया मणी
दिश्ट जाली गोS
ओंवाळ ताका मिठा कणी
हट्ट सोड गो.
Contributed by Usha Kamat
जय गो बायेक जय
आनी बिलून खाली सोय
जय बायेक जयचें
आनी दुदू गोड गायचें
गायचें दुदू गोड गोड गोड
बाय गो जातलें
व्हड गो व्हड.
Contributed by Usha Kamat
भुकी लागली गो
बायेच्या पोटां
दुदू हाडा गो
एका घोंटा.
Contributed by Usha Kamat
कुरू कुरू काना म्हशी गेल्यो राना
हाडून दी रे गवळ्या मामा
वेल्या राना
जोई – जोई म्हणून करचें नुनू पिवूचे गायचें
साकर घालून घेवचें सांजवेळचें
जोई —–
लोक वेद एक लोकजीण, श्रीनिवास प्रभू देसाय, रिवण
जनरी वाळ्यांची रे बाबुल्या
पावलां वाजत
मडकय सावन मामा येतलो
ताका रे दाखय.
Contributed by Usha Kamat
ता करी कशी थातुली
भामान भरली बायेची हातुली.
Contributed by Usha Kamat
ता गे बाये ता गे बाये तिंगणा
पयशाची हाडलीं चार वांयगणां
तोणाक करूंक पावना
भरीत करूंक गावना.
Contributed by Usha Kamat
लाडू वळ गे लाडू वळ गे
अंबाबाई
एक एक लाडू तुपाचो खावं
सवंगड्यां बराबर खेळूंक जावं.
Contributed by Usha Kamat
न्हीद रे बाळा चांफ्या कळ्या
म्हगेल्या मांडयेर
न्हिदून उठून रडचें सोडून
खेळ रे हांडयेर.
Contributed by Usha Kamat
आलेली गे कुलली
कुललीची गे टोपी
बाळ गे म्हजो कोपी
पाळण्यांत गे झोपी
झोपेच्या गे वेळी
बाळ गे म्हजो खेळी
खेळटा खेळटां लिपलो
सोदून काड रे मामा.
Contributed by Usha Kamat
बाय म्हजें रडटा पळय
हमसून हमसून
दी गो ताका गोड दूदू
गायचें काडून.
Contributed by Usha Kamat
कारात्याची बी
झरोवन पी
म्हाका नाका, तुका नाका
गवळ्याक दी
गवळ्याच्या दारांत
पणस पिकला
शेरभर तांदळांत
गवळी लिपला.
Contributed by Usha Kamat
कुरकूर काना
म्हशी गेल्यो रानां
रानांतल्यो म्हशी परतुना
आनी बाबू आमचो मस्ती करना.
Contributed by Usha Kamat
फूल रे चांफ्या फूल रे चांफ्या ताळीभर
गूंत गो सखू गूंत बो सखू वळसर
माळ गो विठ्या माळ गो विठ्या मात्याभर
पळेतलो आवय बापूय दोळेभर
लोक वेद एक लोकजीण, श्रीनिवास प्रभू देसाय, रिवण
बाये गो,
कोकून भात खाल्ले
खाता तितलें खावंदी
कोकू मोठें जावंदी
आमी कोकू खावया
आमी मोठीं जावया.
Contributed by Usha Kamat
आस्कीन बास्कीन
उदक तापय गो,
व्हडल्या खाडा मामा येयल्यार
तांबयो लिपय गो!
संकलक – डॉ. जयंती नायक
बाबू आमचो शाणो कसो
लोकां भुरग्यां मारना कसो
लोकां भुरगीं आलो-पालो
आमचो बाबू मोतयां झेलो.
Contributed by Usha Kamat
एक भोबो ताटाचो
मामागेल्या शेता-भाताचो
रोसां बुडोवन खाया गो
हाम्म कोराय गो! हाम्म!
संकलक – डॉ. जयंती नायक
दामाय दामसुलो रे बाबा
दामाय दामसुलो
दामसुलो करून दाखय म्हाका
केळ्यांचो भोबो दिता तुका
दामाय दामसुलो.
Contributed by Usha Kamat
आणकुल्यो माणकुल्यो सवाय माणकुल्यो
कुरकुटां माजर बसलां मेंव कर गो माजरा
शिरोडेची कायल – बांदोडेंचो दवलो
कोणाक जाय धुमको धुम्म
कोणाक जाय चिमटो चिम्म
लोक वेद एक लोकजीण, श्रीनिवास प्रभू देसाय, रिवण
माकडा माकडा हूप हूप हूप
शेंपडेक लावया तेल आनी तूप
तेलान शेंपडी जाली वोली
माकडाक दवरिल्लीं केळीं
बाबून खालीं
माकडा माकडा कूय कूय कूय
आरे माथ्यार पळय तुज्या
ऊय ऊय ऊय.
Contributed by Usha Kamat
फळांत फळ बाय आंब्याचें
बायेच्या आमच्या घोस्ताचें
आंबो पळोवन तोंडार
फांकलें हांशें
ताच्या गालावेली खळी पळोवन
लागलें पिशें.
Contributed by Usha Kamat
बायेच्या ताळवेर घालात
तेला थेंबो
पोरसांतल्या उदकांत नाचता
हडवो बेबो
हडव्या बेब्याचे त्या
दोळे बटबटीत
तेलान जाले बायचे
केंस तिकतिकीत.
Contributed by Usha Kamat
कुटूर गो नाचता
फुडल्या दारांत
बाय म्हजें खेळटा
व्हडल्या घरांत.
रुचीक बरें कातली मेमें
सदांच म्हाका जाय
आजये सरीं पाय घे म्हाका
आजये सरीं पाय
तामली तामली फुटी कडी
पेल्यांत घालून जाय
पिवंक म्हाका दी गे आजये
जायच म्हाका जाय.
Contributed by Usha Kamat
हे वटेन धांव रे, ते वतेन धांव रे तेनालेच्या वेला…
आमच्या बायगेर बाबू जाला, धांव रे बाबा तेला…
सान सानुल्या मोगरें कळ्या, फुलतलो केन्ना कसो सांग,
वाटेवेल्या व्हांवत्या व्हाला मारून कशी येतली दांग…
फुलतलो केन्ना कसो सांग.
दोनूय घरांचो फुलता वंश रूख, दोनूय दोळ्यांचें तूच एक सूख
मळबाची निळाय, दर्याची खोलाय
फेडटले कशी मायेची पांग.
Contributed by Mayur Kantak
खिळी खिळी
खुळू खुळू
हालयलो हांवें खुळखुळो
बाय म्हजे कशेंच न्हिदना
केलो म्हाका न्हिदेंत पिसो
खुळू खुळू
खिळी खिळी
बाय हालयता खुळखुळो
राती कडेन दीस केला
ताचो खेळपाचो वेळ जालो
खिळी खिळी
खुळू खुळू
हालता पळय खुळखुळो
न्हीद गे राणी
पप्पाची शाणी
तुज्या मम्माचो लागला दोळो
खुळू खुळू
खिळी खिळी
वाजता पळय खुळखुळो
Contributed by Pranita Redkar
ओ जयी… जयी
बिलून खाली सोय
कित्याक रे बिलू मारता
आंगली तोपरी सुकयता
आंगली तोपरी वडा खाली
वड म्हणटा व्हड फळां
फळाक पडले किडे
मामाच्या घरभर विडे
विड्यां नाही चुन्नां
मामाच्या घरभर सुरगां
सुना नाही चोळ्या
मामाच्या घरभर पोळ्या
पोळ्यां नाही तूप
आनी काय बरें शाणूचें रूप
Contributed by Netaji Kamat Sambary
पावस पडटलो
कुणग्यो बुडटल्यो
येदें व्हडलें शेत बाबुल्या
कोण रे नडटलो
रडू नाका
आका तुका देव पावतलो
पावसां दिसा शेतांत घाला रोव गे रोव
रामरायाच्या कृपेन आमी जेव गे जेव
Contributed by Netaji Kamat Sambary
बाब रे तो भिण्णां खाता
गोड रे साकरू…
वाड्यावेल्यो बायलो म्हणटात
खंयचो माकडू…
मारलो बडयलो रे तेका
कोणें तिडायलो…
अपुरबायेच्या भांगराक म्हज्या
कोणें रडयलो…
Contributed by Netaji Kamat Sambary
बाबाल्या घडयाळीक भांगराची कडी,
दादान हाडल्या ताका मोटारगाडी,
मोटारगाडी घेवन रे बाबू खंय रे वता,
दादा गेला फोंड्या ताका हाडूंक वतां.
Contributed by Megha Rivankar
कावळ्या कावळ्या खंय रे गेल्लो?
गेल्लो पळोवंक शार,
येदें बेगीन आयलो कसो?
मदींच जालो फार,
गुळी बिळी लागली हय रे?
म्हजीच जाली गुळी,
कोणें तुका पायलो हांगा?
हांवेंच काडली पळी.
Contributed by Megha Rivankar
#Konkani #lullaby #children #songs