आयज विश्व कोंकणी दीस. संवसारभर फांकिल्ल्या सगळ्या कोंकणी  लोकांक ‘विश्व कोंकणी दिसाचीं’ खूब खूब परबीं!

कोंकणी  भाशेंत उलयतना, हे भाशेंत नवें गिन्यान, विचार, कल्पना निर्माण करून आमी आमचे भाशेच्या बळग्याची आनी मोलाची संवसाराक जाणविकाय करून दितात. अशान आमी कोंकणी भाशेचो एके तरेन गौरव करतात आनी खरें म्हणल्यार तें फकत आयज न्हय तर 365 दीस जावपाक जाय. ताचो विचार आमी आमच्या खिणा-खिणा दवरूंक जाय, आमच्या दर एके कृतींतल्यान तें दिश्टी पडपाक जाय.

कोंकणी  ही गिन्यानाची भास जावंक जाय. पूण हें घडटा आसतना बदलपी प्रवाह मतींत घेवचे पडटले. आयची तरणाटी पिळगी चडसो दीस वेग-वेगळ्या सोशल मिडियांचेर घालयतात. सगळे न्हय, पूण बरेचशे तरणाटे मध्यम दर्ज्याचीं रिलां पळोवपाक आपलो बरोच वेळ घालयतात.

पूण ह्या सगळ्या लोकांक कोंकणी  भाशेंतल्यान विज्ञान ते अर्थीक संकल्पना अशे जायत्या विशयांचेर माहिती आनी गिन्यान मेळ्ळें जाल्यार तांकां तें शेर्त पळोवंक आवडटलें. आयज कोंकणींत यू-ट्यूबा खातीर खूब कण्टॅण्ट तयार जाता हें म्हाका खबर आसा पूण ताचें प्रमाण निश्चितूच उणें आसा. 

आयज कोंकणी  लोक वेग-वेगळ्या मळार / क्षेत्रांनी खूब उंचेल्या पदांचेर काम करतात, तांच्या मळार / क्षेत्रांनी तांचो बरोच अभ्यास आसा. आमी फकत तांचें गिन्यान आनी अणभव ह्या सोशल मिडियाचेर एके मनोरंजक रितीन लोकां मेरेन पावयल्यार कशें?

विकिमीडिया फावंडेशनाचें, ‘विकिपीडिया’ आमकां सगळ्यांक वळखीचें. त्याच विकिमीडिया फावंडेशनाच्या ‘विकिस्रोत’, ‘विकिमीडिया कॉमन्स’, ‘विकिव्होयज’, ‘विकिस्पीशीज’ सारकेल्ल्या आभासी मंचांचो उपेग कोंकणी भाशेंत गिन्यान दिवपा खातीर सहजपणान करूं येता. विकिमीडिया सारक्या आभासी मंचांचेर ऑडियो, व्हिडियो अशा जायत्या रुपांत गिन्यानाची माहिती प्रसारीत करप शक्य आसा. ह्या सगळ्यांचो मुक्त आनी प्रभावी वापर करपाक कसलोच त्रास जावंक फावना. (विकिपीडिया हो ‘प्लॅटफॉर्म’ पूण ताका ‘आभासी मंच’ हें उतर वापरलां, अशा पर्यायी उतरांचो दिसपट्ट्या वापरांत घोळूंक जाय.

कोंकणी  भाशेचें किदें जातलें हाचो शोक करचे परस लोकांची बदलती आवड मतींत दवरून ते प्रमाण स्वताक बदलप खूब गरजेचें.

मजगतीं, सोशल मिडियाचेर लोकप्रिय आशिल्ल्या कोंकणी  इनफ्लुयन्सरांचो अनेक सरकारी, बिगर सरकारी संस्थांनी भोवमान केलो वा तांचे खातीर येवजण्यो राबयल्यात. पूण मनरिजवणे भायर सोशल मिडियाचेर कोंकणीक गिन्यानाची भास करपी लोकांकूय फावो तो मान दिवपाची  गरज आसा. म्हजे सारके अनेक लोक तें जावचें म्हणून  आप-आपले परीन वावुरतात. अशा लोकांक प्रोत्साहन दियात, कमीच कमी तांकां फाटीं ओडून निराश करूं नाकात. परत एक फावट ‘विश्व कोंकणी दिसाचीं’ खूब खूब परबीं!

Contributed by Sanath S. Bharne