साहित्य 

1 वाटी उकडें तांदूळ

1 मोटो चमचो मेथी

1 नाल्लाचो रोस

1/4 किलो माडाचें गोड 

1/2 चमचो मीठ

कृती

गॅसार कायल दवरून उकडें तांदूळ आनी मेथी बरी भाजून घेवप. मेथी, तांदूळ मंद आचेर भाजून घेवप गरजेचें. गॅस मोटो करून भाजल्यार धुरकट – करपिल्लो वास येवपाची शक्यताय आसता वा भाजणी अर्दकच्ची उरपाक शकता.

मेथी – तांदूळ भाजल्या उपरांत न्हिवपाक दवरप. ते न्हिवता म्हळ्यार नाल्लाचो रोस काडप. रोस काडपाक नाल्लाची कातिल्ली सोय एक कप उदक घालून मिक्सरांत बारीक वांटून घेवप. भाजिल्ली मेथी – तांदूळ न्हिवतांच मिक्सरांत ताचो सुको पिठो करून घेवप. हो पिठो चड मोटो आसचो न्ही आनी चड बारिकूय वांटचो न्ही. मध्यम वांटून पूड तयार करची. मेथी – तांदळाचो पिठो तयार जाताच चुलीर एका तोपांत नाल्लाचो रोस आनी तो पिठो घालून एक सारकें चाळीत रावप (चाळीत रावल्यार पिठाचे गुळे जायनात.) चाळटना माडाचें गोड, मीठ घालप. मेथयेची पेज बरी धा मिणटां शिजोवन गॅस बंद करप.

माडाचें गोड आनी मेथी थंडेक प्रभावी आसतात. थंडी जाल्यार आयज लेगीत गोंयच्या कांय कुजनांनी मेथयेची पेज शिजोवन घोस्तान खातात. 

अतिशा सुर्लीकार