भारताचो इकरावो राष्ट्रपती जावपाचो मान मेळिल्ले दोतोर अब्दुल कलाम हांचो जल्म 15 ऑक्टोबर 1931 वर्सा एका सादारण घराब्यांत रामेश्वरम ह्या नामनेच्या धर्मीक थळांत जालो. तांचें पुराय नांव अवुल पाकिर जैनुलअब्दीन अब्दुल कलाम आशिल्लें. तांच्या बापायचें नांव जैनुलअबिदिन तर आवयचें नांव अशिअम्मा आशिल्लें. तांचें शालेय शिक्षण केथॉलिक मिशिनरी स्कुलांत जालें. तांकां आपल्या आवय – बापाय वरी शिक्षकांचेर खूब मोग आशिल्लो. आवय – बापूय आनी आपल्या शिक्षकांनी केल्ल्या संस्कारांनी आपूण व्हड जायत गेलो अशें ते अभिमानान सांगताले. तांचे एक शिक्षक श्री सिवा सुब्रमण्याम हांणी तांकां वयर मळबांत उडपाचें सपन दाखयल्लें. जें तांचें ‘अग्नी पंख’ जावंक पावलें.

सपन साकार करपाक मनशान जिद्धीन वावर करपाक जाय अशें तांचें म्हणणें आशिल्लें. जैत जोडपाच्या फाटल्यान लागू नाकात पूण ज्ञानाच्या फाटीक लागात. ज्ञानाच्या बळार जैत मेळटा हें सत हांवें अणभवलां अशें ते तरणाट्यांक सांगतालें. आत्मविश्वास मनांत दवरून वावर करात, अपेस जरी मेळ्ळें तरी फाटीं सरनासतना यत्न करीत रावले जाल्यार जैत मेळटाच असो संदेश ते दिताले. कसल्याय कामांत अपेस येवप ही यशाची पयली पायरी म्हूण दर एका भारतीयान केल्लो संकल्प तडीक व्हरपाक कश्ट करीत रावचे अशें तांचें म्हणणें आसतालें. तांचें व्याख्यान आयकुपाक तरणाटे उमळशिकेन रावताले. सपनां पळयात आनी ती साकार करपाक कश्ट करात म्हूण ताणें जीव तोडून सांगचें.

नामनेचे नाटककार विलियम शेक्सपियर एके कडेन बरयता, “कांय मनीस जल्मा सावन व्हड जाल्ले आसतात, तर कांय जाण व्हडपण आपल्या कर्तृत्वान मेळयतात तर भोव थोड्या मनशांक व्हडपण वेंगेंत घेता.” दोतोर कलामांक वयलीं तिनूय व्हडपणां लागू जातात अशें म्हणल्यार अतिताय जावची ना. ते सपनाळू आशिल्ले. तांचीं सपना साकार करपाक तांकां प्रो. विक्रम साराभाई, प्रो. सतीश धवन तशेंच डॉ. ब्रम्हप्रकाश हांचो मोलादीक पालव तरणाटे पिरायेरूच मेळिल्लो. तांचो सरळ सादो सभाव, सादारण जिणेची रीत पूण मनांत सदांच उंचेले विचार बाळगुपी मनीस जाल्ल्यान तांचे जिणेंत एक वेगळेपण आशिल्लें.

डॉ. अब्दुल कलाम हांकां 2002 वर्सा भारताचे इकरावे राष्ट्रपती जावपाचो मान फावो जालो. 1960 वर्सा तांणी मद्रास इंस्टिट्यूट ऑफ टॅक्नॉलॉजींतल्यान इंजिनियरिंगाची पदवी मेळयली. ते जाणा आशिल्ले देशाची उदरगत करून देश उंचेल्या पांवड्यार व्हरचें आसत तर भारतीय तरणाट्यांनी शिक्षण घेवप कितलें गरजेचें आनी तें पुराय करता आसतना येतात तीं आडमेळीं पयस करून मुखार वचत रावचें अशें तांचें मत आशिल्लें. भारतीय नौदळा खातीर तांणी एक ल्हानशेच हॅलिकॉप्टर तयार करून आपल्या वावराचें मोल सुरवातीकच दाखोवन दिल्लें. 1969 वर्सा जेन्ना ते भारतीय अंतरिक्ष शोध संघटन (इस्रोंत) गेले तेन्ना तांणी एस.एल.वी III चेर बेस बरो वावर करून देशी उपगिह स्थापीत करून नामना जोडली. देशाचे अंतरिक्ष कार्यावळींत, प्रक्षेपण यान आनी बैलिस्टिक क्षेपणास्त्र तयार करपा फाटल्यान तांचो मुखेल वावर आशिल्ल्यान तांकां मिसायल मॅन ऑफ इंडिया ही पदवी फावो जाली. तेच परी 1998 वर्सा पोखरण II परमाणू परिक्षण करपाक तांच्याच फुडारपणा खाला जैत मेळिल्लें. तांणी सुमार वीस वर्सां भारतीय अंतरिक्ष शोध संघटन म्हणल्यार (इस्रो) हे संस्थेंत मोलाचो वावर केला. तेच परी संरक्षण संशोधन आनी विकास संस्था (डीआरडीओ) चे ते धा सुमार वर्सां अध्यक्ष आशिल्लें. तांचे अध्यक्षे खाला, अग्नी आनी पृथ्वी ही स्वदेशी क्षेपणास्त्र तयार करपाचो व्हड वावर पुराय केल्लो.

डॉ. कलाम हांकां आपलो देश पुरायपणान विकसीत देश जाल्लो पळोवंक जाय आशिल्लो, भारत देश अर्थीक दृश्टींत सक्षम आनी शक्तिशाली देश आसचो अशें सपन तांणी पळयल्लें, देखून ते शालेय विद्यार्थ्यांक तशेंच वेगवेगळें वेवसायीक शिक्षण घेवपी तरणाट्यांक मेळटालें. तांचे लागीं फुडाराची मोख कितें, भुरग्यांचे दृश्टीन ती कशी आसची ताच्या विशीं उलयताले आनी तांकां मार्गदर्शन करताले. ते भारतीय तरणाट्यांक वयर उडपाचें बळगें दिवपा खातीर वेगवेगळ्यो देखी दिवन उकत्या दोळ्यांत नवें कितेंय करपाचें सपन दाखयतालें. ते तरणाट्यांचे लाडके शिक्षक आनी तेजवंत फुडारी जावंक पाविल्ले. एक सादारण मनीस मनांत आयल्यार कितेंय करपाक शकता, हें ते आपल्या अणभवा वेल्यान सांगताले आनी भुरग्यांक प्रोत्साहीत करताले. ह्या संवसारांत कसलीच गजाल अशक्य ना अशें तें मानताले देखून ते सदांच नव्यो नव्यो गजाली शिकपाक तत्पर आसतालें. देश कशे तरेन आत्मनिर्भर जावं येता हाचेर तांचे तरणाट्या लागीं उलोवप करतालें. नवे नवे प्रयोग करपाचेर ते भर दिताले. विज्ञानाच्या बळाचेर देश बळिश्ट जावं येता असो विश्वास तांकां आशिल्लो.

भारताचें भविश्य उज्वल करतलें जाल्यार विज्ञानाचो आदार घेवनूच ते करूं येता हाचो उल्लेख तांचें पुस्तक ‘इंडिया 2020 ए विजन फॉर द न्यू मिलिनियम’ हातूंत वाचूंक मेळटा. भारत बुद्दीमत्तेचें अप्रतीम बळिश्ट आनी एक विकसीत राष्ट्र जावचें अशें मत तांणी ह्या पुस्तकांत उक्तायला. देशाची उदरगत करपाक प्रसार माध्यमांनी सकारात्मक विचारसरणी दवरून आपलें काम करपाक जाय, नकारात्मक खबरो कोणाच्याच फायद्याच्यो आसनात पूण विकासाच्यो खबरो मनश्यांक नवें बळगें दिवपाचो वावर करता. देखून प्रसार माध्यमांनी फुडाकार घेतलो जाल्यार देशाचे उदरगतीक लोकांक उत्तेजीत करूंक शकतले असो तांचो दृड विश्वास आशिल्लो. दोतोर कलाम एक नामनेचे वैज्ञानीक, प्रशासक, शिक्षक आनी एक व्हड लेखक म्हूण आयज तांकां आमी याद करतात. ते आमचो लोकांचो राष्ट्रपती (पिपुल्स प्रॅजिडण्ट) जावंक पावले ते वगीच न्हय. 27 जुलय 2015 दिसा शिलोंगच्या इंडियन इन्स्टिट्यूट ऑफ मॅनेजमॅण्टांत व्याख्यान दिवपाक गेल्ले. थंय तांकां काळजाचो आताक आयलो आनी ते संवसारीक अंतरले. भारत रत्न डॉ. ए. पी. जे. अब्दुल कलाम हे समेस्त तरणाट्यांचे प्रेरणास्रोत.

एच. मनोज

#APJAbdulKalam #President #Scientist #Inspiration #Essay #Educational