भारतांत दिसान दीस येरादारी वाडत आसा. स्कूटर वा गाडी वा हेर वाहनां चलतना शिस्त आसची आनी अपघात जावचे न्हय म्हूण सरकारान येरादारी नेम घाल्यात. तशेंच येरादारी विशींचीं सिगनलां पाळचीं पडटात. येरादारी नेम मोडल्याक दंड फारीक करचो पडटा. हॅल्मेट घालून स्कूटर चलोवप, गाडी चलयतना सीट बॅल्ट घालप हे सगले येरादारी नेमाचोच एक भाग आसा. येरादारी नेमां विशीं आमी जाणून घेवया.

1. वेग नियंत्रण (speed limit)

रस्त्याचेर वाहन चलोवपा खातीर वाहनांची वेग मर्यादा निश्चीत केल्ली आसता. निश्चीत केल्ले वेग मर्यादे भितरच वाहनां चलोवचीं पडटात. कांय रस्त्यांचे कडेक 40 किलो मिटर प्रती वर अशें बरयल्लें आसता. म्हणल्यार वाहनाची गती 40 च्या भितर आसपाक जाय. ही वेग मर्यादा हुपल्यार दंड लागू जाता.

2. एक मार्ग (one way)

रस्त्याचेर येवपाक आनी वचपाक दोन वेगवेगळे मार्ग आसतात. एक मार्ग गाडयांक येवपाक आनी दुसरो मार्ग गाडयांक वचपाक आसता. गाडी येवपाक मार्ग आसा थंयच्यान गाडयांक वचपाक मेळना तशेंच वचपाक आशिल्ल्या मार्गांत गाडयांक येवपाक मेळना. नेमाचो भंग केल्यार येरादारी पुलीस दंड दितात. तशेंच अपघात जावपाची शक्यताय आसता.

3. सुरक्षीत ओवरटेक (overtake)

आपल्या वाहनाची गती मतींत दवरून दुसर्‍या वाहनांक ओवरटेक करपाक जाय. तशेंच ओवरटेक करूंक जागो योग्य आसा काय ना, जागो रुंद आसा काय ना, फुडल्यान वाहन येता काय ना हाची खबरदारी वाहन चलोवप्यान घेवप्यान घेवंक जाय.  

4. हॉर्नाचो वापर (use of horn)

वाहनांची व्यस्त आशिल्ल्या रस्त्याचेर वाहन चलयतना तुमी परत परत हॉर्न मारप हो चुकीचो प्रकार. गरज नासतना परत परत हॉर्न मारप ना. सामकी गरज आसल्यारूच हॉर्न मारप. कांय लोक मर्यादे भायल्या आवाजाचे हॉर्न वाहनांक लायतात. ताका लागून ध्वनी प्रदुशण जाता आनी ताचे खातीर दंडूय भरचो पडूं येता. शाळा, हॉस्पिटल वाठारांनी हॉर्न मारपाक मनाय आसता. ह्यो गजाली मतींत दवरूंक जाय.

5. पार्किंग (parking)

पार्किंगा खातीर निश्चीत केल्ल्या जाग्यारूच वाहन पार्क करूंक जाय. खंयूय वाहन पार्क केल्यार येरादारींत आडखळ जाता आनी येरादारी नेमांचे ते उल्लंघन थारतले. तशेंच गाडये खातीर पार्किंग निर्दिश्टीत केल्ली आसल्यार थंय मोटरसायकल वा स्कूटर पार्क करूंक जायना. येरादारी पुलीस वाहनांक लॉक घालपाक शकतात वा वाहन उबारून व्हरपाक शकता. दंड भरल्या उपरांतूच वाहन परत मेळटा.

6. हॅल्मेट आनी सीट बॅल्ट (helmet and seatbelt)

स्वताचे सुरक्षे खातीर स्कूटर वा मोटरसायकल चलोवप्यान हॅल्मेट घालूंक जाय. तशेंच फाटल्यान बशिल्ल्यानूय हॅल्मेट घाल्यार बरें. आनीक एक गजाल, स्कूटर वा मोटरसायकलीचेर दोन परस चड लोकांनी प्रवास करचो न्हय. नेमांत ते बसना आनी सुरक्षेचे नदरेंतल्यान ते धोकादायक. चारचाकी वाहना चलतना सीट बॅल्ट घालपाकूच जाय. चलोवप्यान तशेंच गाडयेंत बशिल्ल्यान हेर लोकांनीय सीट बॅल्ट घालूंक जाय.

7. लायसन्स, इन्शुरन्स, प्रदुशणाचो दाखलो (license, insurance, PUC)

रस्त्यार खंयचेंय वाहन चलयतलो जाल्यार लायसन्स म्हणल्यार वाहन चलोवपाचो परवानो आसूंक जाय. 18 वर्सां पिराये वयलेच व्यक्तीक लायसन्स मेळपाक शकता. तशेंच त्या वाहनाचें योग्य इन्शुरन्स आनी प्रदुशणाचो दाखलो आसूंक जाय. आतां सरकारान सगल्या वाहनांक फास्ट टॅग सक्तीचें केला.

ट्रॅफिक सिग्नल्स

तांबडें सिग्नल: येरादारीचे मुखेल तीन दिवे आसतात. तातूंतलो तांबडो दिवो वा सिग्नल म्हणल्यार वाहन थांबोवप. तांबडें सिग्नल आसमेरेन वाहन निश्चीत केल्ल्या लायनी भायर व्हरपाक मेळना.

हळदुवें सिग्नल: तांबड्या दिव्या उपरांत हळदुवो दिवो पडटा. म्हणल्यार तुमी गाडी फुडें व्हरूंक फुडें रावात. कांय खिणांतूच पाचवो दिवो जाता.

पाचवें सिग्नल: हळदुव्या दिव्या उपरांत पाचवो दिवो पडटा. म्हणल्यार तुमी गाडी फुडें व्हरूंक मेकळें. पूण वाहन फुडें व्हरतना हे वटेन ते वटेन पळोवन सवकास फुडें व्हरप गरजेचें.

हे मतींत दवरचें

1. रुग्णवाहिका म्हणल्यार एम्ब्युलन्स वा फायर ब्रिगेड हांकां पयली रस्तो दिवचो.

2. वाहन चुकीच्या मार्गान वा मान्यताय नाशिल्ल्या जाग्यांत पार्किंग करचें न्हय.

3. वाहन चालयतना दुसर्‍या वाहनाच्या वेगा कडेन सर्त करची न्हय. वेग मर्यादा पाळची.

4. ट्रॅफिक सिग्नलांचें पालन करचें.

5. वाहन चालयतना दाव्यान वा उजव्यान वाहन घेतना सायड लायट मारची तशेंच हाताचो वापर करचो.

6. चौक, यु-टर्न आनी गर्दीच्या जाग्यांत वाहन ल्हव चलोवचें.

7. वाहन चालयतना येरादारी नेमांचे उल्लंघन करचें न्हय.