(हो निबंद विद्यार्थ्यां खातीर फकत एक नमुनो. हो निबंद तश्या तसो घेवचो न्हय.)

          धर्तरेवेल्या सरासरी तापमानांत सातत्यान जावपी वाडीक जागतीक तापमान वाड वा वैश्वीक तापमान वाड अशें म्हणटात. हरीतगृह वायूंचें वाडिल्लें प्रमाण ताका कारणीभूत आसा. ह्या वायूंत बाश्प, कार्बन डायऑक्सायड, मिथेन, नायट्रस ऑक्सायड, ओझोन आनी क्लोरोफ्ल्युओरोकार्बन सीएफ सी हांचो आसपाव आसा. विसाव्या शेंकड्याच्या मध्या सावन तापमानांत जाल्ली ही वाड मानव निर्मीत आसा अशें विज्ञानिकांचें म्हणणे आसा.

          जागतीक तापमान वाडीक जायतीं कारणां आसात. सूर्यप्रकाश, वायू आनी धुलीकरण हांचे क्रियेक लागून हो परिणाम जाता. जिवाश्म इंधन जळप आनी झाडां कापप हीं हेर दोन मुखेल कारणां आसात. जिवाश्म इंधन चडशे फावटी गाडयांनी, उद्देगांनी आनी वीज निर्मिती केंद्रांनी जळटात. हें इंधन जळयल्ल्यान कार्बन डायऑक्सायड ह्या हरीतगृह वायूची निर्मिती जाता. वनस्पती स्वताचे अन्न तयार करतना प्रकाशसंश्लेशण क्रियेंत हवेंतल्या कार्बन डायऑक्सायडाचो वापर करतात. वातावरणांत कार्बन डायऑक्सायड वायू ओडून घेवपाचें प्रमाण उणें जाल्ल्यान ह्या वायूचें प्रमाण वाडत आसा.

          जागतीक तापमान वाडीचे परिणाम खूब हानीकारक आसात. हाचो परिणाम म्हूण सजिवांचे अधिवास धोक्यांत येवपाक शकता. नव्या अधिवासाच्या सोदांत प्राण्यांचें स्थलांतर जावपाक शकता. हवामानांत बदल जावन हुंवार आनी हानीकारक वादळां येवंक शकतात. धर्तरेवेले बर्फ विरगळून दर्याची पातळी वाडूंक शकता आनी सजिवांच्यो कितल्योश्योच जाती नश्ट जावंक शकतात. ते भायर, जगाच्या कांय भागांनी भिरांकूळ दुयेंसांची पसरण, शेती उत्पादन उणें जावप आनी येरादारी मार्गांत बदल हे सारकिल्यो घडणुको घडपाक शकतात.

          धर्तरेवेलो तापमान असोच वाडत रावल्यार ग्रीनलॅण्ड आनी अंटार्क्टिका ह्या वाठारांतले बर्फ मोट्या प्रमाणांत विरगळूंक शकतात आनी ताका लागून दर्यादेग वाठारांनी हुंवाराची निर्माण जावपाक शकता तशेंच जमनीची धूप जावपाची भिरांत आसा. न्हंयच्या उदकांत खारें उदक मिसळपाचीय शक्यताय आसा. दर्यादेग वाठारांतलीं सगलीं शारां व्हांवून वचपाची शक्यताय न्हयकारूं नजो. हाचे भायर, जायते दीर्घ काळाचे परिणाम मनशांक सोंसचें पडूं येता.

          हाचेर उपाय आसात. पूण ते आतांच घेवपाक जाय आनी सातत्यान पाळपाक जाय. जाल्यार तापमान वाडीचो हो प्रस्न कांय प्रमाणांत सुटावो जावपाक शकता. कार्बन डायऑक्सायडाचो वापर आमकां कमी करचो पडटलो. ताच्या उत्सर्जनाचेर एक मर्यादा घालची पडटली. कार्बन डायऑक्सायडाचें प्रमाण उणें करप हो हाचेर एक मुखेल उपाय आसा. आतां इलॅक्ट्रीक गाडयो येवपाक लागल्यात. ताचो चडांतचड वापर केल्यार कार्बन डायऑक्सायड सोडपाचें प्रमाण उणें जातलें. दरेका देशान जिवाश्म इंधन निर्मितीची मर्यादा थारावंक जाय. अशे केले जाल्यार कार्बन डायऑक्सायडाचें उत्सर्जन उणें जातलें. सगल्या देशांनी एकठांय येवन एकठांय ह्या प्रस्नाचेर काम करपाक जाय. जाल्यार आमी आमची धर्तरी वाचोवंक शकतले. आयपीसीसी हें एकवटीत राष्ट्र संघ पुरस्कृत एक आंतरराष्ट्रीय मंडळ पर्यावरणाचें रक्षणा खातीर नेटान काम करता. पर्यावरण आनी ताचें रक्षण केल्यार आमी धर्तरेवेली जिवनसृश्ट वाचोवंक शकतले तशेंच जागतीय तापमान वाडीचो मुद्दो सोडोवंक आमकां येस मेळूं येता.

#Global_Warming #Save_World #Essay #Goa #Educational