शांताराम वर्दे वालावलीकार – Shantaram Warde Walawalikar

शांताराम वर्दे वालावलीकार हांची कोंकणीचे नामनेचे लेखक, संशोधक, भाशातज्ञ आनी संगणकतज्ञ म्हणून वळख आसा. कोंकणी भास, संगणकाचें गिन्यान आनी संस्कृत भाशेची जाण हे वरवीं तांणी कोंकणीच्या मळार सातत्यान आपली सेवा दिली. 

‘मेघदूत’ हें संस्कृत काव्य तांणी थेट संस्कृत भाशेंतल्यान कोंकणींत अणकारीत केलां. तांणी कविता, कथा आनी लेख बरयल्यात. शणै गोंयबाब जल्म शती निमतान कोंकणी भाशा मंडळान शणै गोंयबाब हांच्या जिवीत आनी बरपाचेर उजवाडायिल्ल्या ‘वज्रलिखणी’ ग्रंथाचें संपादन शांताराम नायक हांणी केलां. गोवा कोंकणी अकादेमीन ‘समग्र शणै गोंयबाब’ चार खंडांत उजवाडायलां. ताचेंय संपादन तांणी केलां.

केंद्रीय मानव संसाधन विकास मंत्रालयाच्या इलॅक्ट्रॉनिक्स विभागा खातीर अस्मिताय प्रतिश्ठानान कांय वर्सां आदीं कोंकणी उतरांची कोठी म्हणल्यार कॉर्पस हो प्रकल्प तयार करून दिल्लो. तातुंतूय शांतारामबाबांचो हातभार आशिल्लो. तशेंच राजभाशा संचालनालयाच्या शब्दावली निर्मिती समितींत तांचो आसपाव आशिल्लो आनी कायदो विशयक शब्दावली निर्मितीचें काम तांणी केल्लें.

गोंय विद्यापिठांत युनिवर्सल नॅटवर्कींग लँगवेज ह्या प्रकल्पांतल्या कोंकणी दालना खातीर ते आदार करताले. गोंय विद्यापिठाच्या कोंकणी शब्दमालें (Wordnet) प्रकल्पाचे ते सल्लागार आशिल्ले. मंगळूरच्या विश्व कोंकणी केंद्रा खातीर ऋग्वेदाचो कोंकणी अणकार लेगीत करपाचें तांचें काम ते करतालें.

शांताराम वालावलीकार हांकां 17 ऑगस्ट 2019 दिसा मरण आयलें.

Contributed by Sneha Sabnis

#Konkani #writer #biodata #information #ShantaramWalawalikar