डॉ. तानाजी हळर्णकार – Dr. Tanaji Halarnkar

डॉ. तानाजी हळर्णकार हांचो 18 सप्टेंबर 1943 दिसा जल्म फोंड्यां बांदोडें गांवांत जालो. ते कोंकणी भाशा मंडळ गोंयचे आदले अध्यक्ष आनी एक व्यासंगी विचारवंत, संघटक, आयोजक आनी प्रशासक आशिल्ले.

कोंकणी संशोधनात्मक वावरांत तांचें खूब मोटें योगदान आसा. कोंकणींतलो पयलो विश्वकोश गोंय विद्यापिठा वतीन संपादीत करपाचें काम तांणी केल्लें. चार खंडांचो विश्वकोश तांणी संपादीत केला. ह्या वावराक सुमार 14 वर्सां लागलीं.

फागूरफाट हें तांचें चिंतनात्मक लेखांचें पुस्तक उजवाडाक आयलां. सुनापरान्त ह्या कोंकणी दिसाळ्यांतल्या ‘थोडें म्हजें, थोडें तुमचें’ हें तांचें गाजिल्लें सदर. भांगरभूंय ह्या दिसाळ्याच्या वेवस्थापनांत तांणी कांय काळ काम केलां. ग्रामपंचायत ह्या विशयाचेर तांणी इंग्लीशींत बरयल्लो प्रबंध पुस्तक रुपांत उजवाडाक आयला. तांणी एकांकी आनी हेर स्फूट बरपां केल्यांत.

केंद्रीय मनीसबळ संसाधना मंत्रालयाच्या विज्ञानीक आनी तंत्रीक शब्दावली आयोग, नवी दिल्ली, केंद्रीय भाशा संस्था, मैसूर, राजभाशा संचालनालय, गोंय सरकार ह्या सारकिल्या वेगळ्या वेगळ्या संस्थांनी उतरावळ निर्मिती खातीर तांणी वावर केला. हे कोंकणी कोश रचपा खातीर निमंत्रक म्हूण भुमिका सादतना तांणी मोलादीक योगदान दिलां.

केंद्रीय साहित्य अकादेमीच्या कोंकणी सल्लागार समितीचे ते निमंत्रक आनी कार्यकारी वांगडी आशिल्ले. मणिपालच्या मणिपाल विद्यापिठांत कोंकणी अध्यासनांत तांणी सेवा दिल्या. अखिल भारतीय कोंकणी परिशदेचे अध्यक्ष, गोवा कोंकणी अकादेमीचे उपाध्यक्ष, तशेंच मंगळूरच्या विश्व कोंकणी केंद्राच्या कोंकणी शिक्षण आनी संशोधन विभागाचे ते संचालक आशिल्ले.

गोंय सरकाराच्या कला आनी संस्कृती संचालनालयाचो साहित्या खातीरचो राज्य पुरस्कार (2012) तांकां फावो जाला. तशेंच गोवा कोंकणी अकादेमीचो साहित्य प्रज्ञा पुरस्कार आनी थॉमस स्टिफन्स कोंकणी केंद्राचो कोंकणी पुरस्कार (2011) तांकां फावो जाल्यात.

19 ऑक्टोबर 2020 दिसा तांकां मरण आयलें. ते 77 वर्सांचे आशिल्ले.

Contributed by Sneha Sabnis

#TanajiHalarnkar #biodata #information #Konkani