जेस फर्नांडीस -Jess Fernandes

जेस फर्नांडीस हांचो जल्म 6 सप्टेंबर 1941 दिसा काणकोणां पाळोळें जालो. तांचें खरें नांव मेनिनो. पूण जेस ह्या नांवान तांणी कोंकणी साहित्य बरयलां. कथा आनी कविता हे दोनूय साहित्य प्रकार तांणी हाताळ्ळ्यात.

देवनागरी आनी रोमी ह्या दोनूय लिपयांनी तांचीं पुस्तकां प्रकाशीत जाल्यांत. पांयवाट, किरवंत हे तांचे कविता झेले उजवाडाक आयल्यात. कश्टाचे वांटे हो कोंकणी कथा झेलो 2019 वर्सा प्रकाशीत जाला.

किरवंत ह्या तांच्या कविता झेल्याक 2009 वर्सा साहित्य अकादेमी पुरस्कार फावो जालो. हाचे पयलीं, 2005 वर्सा थॉमस स्टीफन्स कोंकणी केंद्राचो आंतोन पेरेर कोंकणी पुरस्कार, 2008 वर्सा कला अकादमीचो साहित्य पुरस्कार तांकां फावो जाल्यात.

केपेंचीं किर्णां हे संस्थेचे ते संस्थापक वांगडी. 1965 वर्सा सावन जेस फर्नांडीस मांड्याच्या उत्सवांनी वांटेकार जातात.

तियात्र आनी खेळ तियात्रांत तांचें योगदान आसा. ह्या योगदाना खातीर 2013 वर्सा तियात्र अकादेमीन तांकां जीवन गौरव पुरस्कार भेटयलो. 2014 वर्सा तांकां गोंय सरकाराचो साहित्या खातीरचो पुरस्कार फावो जालो.

Contributed by Sneha Sabnis

#Konkani #writer #biodata #information #JessFernandes