नमस्कार तुमकां सगळ्यांक हांव स्नेहा सबनीस हे कार्यावळीक उर्बेभरीत येवकार दितां.
“गोंय म्हजें गायता म्हज्या दर्या ल्हाराचेर
शेतां भाटांत रुजता हांगा गीता ओंठाचेर…”
सर्गेस्त कवी रमेश वेळुस्कार हांची ही गाजिल्ली कविता. पाचव्याचार सैमान नटिल्ल्या, कुशावती न्हंयचे देगेर वशिल्ल्या केपें गांवांत तुमकां हांव स्नेहा सबनीस येवकार दितां.
केपेंच्या सरकारी महाविद्यालयाच्या एम. ए. कोंकणी विभागा अंतर्गत कोंकणी अभ्यास मंडळान सर्गेस्त कवी रमेश वेळुस्कार हांच्या उगडासान आंतर महाविद्यालयीन कोंकणी कविता सर्त आयोजीत केल्या. हे सर्ती खातीर गोंयच्या वेगवेगळ्या महाविद्यालयांतले आनी गोंय विद्यापिठांतले विद्यार्थी आमचे मदीं हांगा उपस्थीत आसात.
वेगवेगळ्यो कार्यावळी आयोजीत करूंक आमकां सदांच उर्बा दिवपी प्राचार्य डॉ. जॉयदीपबाब भट्टाचार्जी तशेंच कोंकणी विभागाचे मुखेली प्रोफेसर डॉ. राजयबाब पवार हांगा हाजीर आसात. हांव विनवणी करतां, कोंकणी अभ्यास मंडळाचे अध्यक्ष विष्णू गांवठणकारा लागीं ताणें मानेस्तांक वेदीर हाडचे आनी बसका घेवची.
हे कार्यावळीक आमकां परिक्षक म्हणून लाबल्यात कवी भौ. ग्वादालूपबाय डायस आनी कवी भौ. अंबेशबाब तलवडकार.
हांव सगल्यांत पयलीं कोंकणी अभ्यास मंडळाचे अध्यक्ष विष्णू गांवठणकार हांच्या कडेन विनवणी करता, तांणी प्रास्तावीक उलोवप करचें.
देव बरें करूं.
तरणाट्यांक उर्बा दिवपी आनी कोंकणी कवितेच्या तशेंच नाटकाच्या मळार नामना जोडिल्ले प्रोफेसर डॉ. राजयबाब पवार हे ह्या महाविद्यालयाच्या कोंकणी विभागाचे मुखेली. हांव तांचे कडेन मागतां तांणी सगळ्यांक येवकार दिवचो.
कोंकणी विभागाच्या वावरा विशीं माहिती दिल्ले खातीर तशेंच शब्दांनी सगळ्यांक येवकार दिल्ले खातीर प्रो. राजयबाब तुमचे उपकार.
सर्त म्हणटकच ताचें परिक्षण करपाची व्हड जापसालदारकी आसता. ही जापसालदारकी कोंकणी मळावेल्या दोन नामनेच्या कवींनी स्विकारल्या. भौ. ग्वादालूपबाय डायस आनी भौ. अंबेशबाब तलवडकार.
म्हारगायेचेर जैत व्हरूंक
ना रे देवा उपाय
सगळें जालां म्हारग
फकत हांवूंच उरलां सवाय.
भौ. ग्वादालूपबाय डायस हांची ही कविता सुमार 15 वर्सां उपरांत आयचे परिस्थितींत तितलीच लागू जाता. मामाचो गांव ही तांची आनीक एक गाजिल्ली कविता. भूंयफोड, मळबगंगा, जलस्थल हे तांचे कांय प्रकाशीत कविता संग्रह. नागरी तशेंच रोमी ह्या लिपयांनी त्यो कोंकणी साहित्याची सेवा करतात. तांणी जायत्या कोंकणी पुस्तकांचें लिप्यंतर केलां. गोंय तशेंच गोंया भायर जाल्ल्या वेगवेगळ्या कविता संमेलनांनी तांचो सक्रीय वांटो आसा. कोंकणी भाशा मंडळाचो साहित्य पुरस्कार तांकां फावो जाला. ते भायर तांकां जायते भोवमान फावो जाल्यात.
आमचे दुसरे परिक्षक आसात भौ. अंबेशबाब तलवडकार. मूळ केपेंचोच. पूण हाचे परस ह्या महाविद्यालया कडेन ताचें चड लागशिल्लें नातें आसा. ह्या महाविद्यालयाचो तो आदलो विद्यार्थी. बी.कॉम विशयांत शिक्षण घेतना कोंकणी कवितेच्या मळार ताणें आपलें आनी महाविद्यालयाचें नांव गोंयभर केलें. सर्गेस्त शंकर रामाणी यादस्तीक सर्तींत ताका पयलें इनाम इनाम फावो जाल्लें. वेगवेगळ्या संस्थांनी आयोजीत केल्ल्या कविता सर्तींनी ताका इनामां फावो जाल्यात. जेवण कशें आसचें? ही ताची लोकप्रिय कविता. साहित्या सयत संगीत, नाटक आनी हेर कला प्रकारांनी ताका आवड आसा. हालींच ताणें हाफ सॅन्चुरी मारल्या. हाफ सॅन्चुरी हें कवितेचें पुस्तक उजवाडाक हाडून तांणी कोंकणी साहित्याचें दालन फुलयलां.
कोंकणी भाशेंत साहित्य रचूंक कोंकणी विशयाचो विद्यार्थी आसूंकच जाय अशें ना हें ह्या दोनूय मानेस्तां कडल्यान आमकां शिकूंक मेळटा. दोनूय परिक्षकांक हांव येवकार दितां.
सर्गेस्त रमेशबाब वेळुस्कार हांच्या कवितांनी सैमाचीं वेगवेगळीं आंगां आसतालींच. झाडां-पेडां, सुकणीं-सावदां हांचो आसपाव तांच्या कवनांनी आसतालो. रे मोरा दिगंतरा हे तांचे कवितेंतल्यान आमी आयोजकांनी प्रेरणा घेतल्या. मानेस्तांक आमी फुलांनी येवकार दिवपा बदला मोरा पांख दिवन येवकार दितात. हांव मागता कोंकणी विभागाचे मुखेली प्रो. डॉ. राजयबाब पवार हांचे लागीं तांणी आमचे परिक्षक भौ. ग्वादालूप डायस तशेंच भौ. अंबेश तलवडकार हांकां मोरापांखां दिवन हे कार्यावळीक येवकार दिवचो.
देव बरें करूं.
हांव मागता कोंकणी अभ्यास मंडळाचे अध्यक्ष विष्णू गांवठणकार हांचे लागीं तांणी महाविद्यालयाचे प्राचार्य डॉ. जॉयदीप भाट्टाचार्जी हांकां मोरापांख भेटोवचें.
देव बरें करूं.
मुक्त वातावरणांत शिक्षण जालें जाल्यार विद्यार्थ्यां मेरेन शिक्षण बरे तरेन पावता अशें म्हणटात. अशेंच वातावरण केपेंच्या सरकारी महाविद्यालयांत अणभवूंक मेळटा. आनी हें शक्य जाता आमच्या प्राचार्याक लागून. लिमरिक्स हो कविता प्रकार ते हाताळटात. कला मोगी म्हणून तांकां वळखतात. हांव मागतां प्राचार्य डॉ. जॉयदीप भट्टाचार्जी हांचे लागीं तांणी आपले विचार हांगा मांडचे.
देव बरें करूं सर.
हे सर्तीच्या म्हुर्तार कोंकणी अभ्यास मंडळान एक कोंकणी ब्लॉग सुरू केला. आयज ताचें लोकार्पण हांगा वर्च्युवल पद्दतीन जाता. हांव मागतां आमच्या मानेस्तां लागीं तशेंच सर्तीच्या परिक्षकां लागीं, तांणी ह्या ब्लॉगाचें वर्च्युवल लोकार्पण करचें.
एम.ए. कोंकणी विशय शिकपी विद्यार्थ्यांनी बरयल्ले लेख, कविता, काणयो ह्या ब्लॉगाचेर आसपावीत केल्यात. भांगरभूंय ह्या दिसाळ्याचेर तातूंतले कांय साहित्य उजवाडाक आयिल्ले आसा. कोंकणी मजकूर इंटरनॅटाचेर मेळचो ह्या हावेसान हें पावल मंडळान उबारलां.
सगळ्यांचे खूब खूब उपकार.
मानेस्तांचे मान्यतायेन उक्तावण सुवाळो सोंपिल्ल्याचें हांव जाहीर करतां.
आतां आमी सर्तीक सुरवात करतले. हांव मागतां रिमीबाय वाझ आनी डोरीसबाय फारीया हांचे लागीं, तांणी फुडलीं सुत्रां हातांत घेवचीं.
मानेस्तां लागीं विनवणी आसा तांणी प्रेक्षकां मदीं आपली बसका घेवची. देव बरें करूं.
Contributed by Sneha Sabnis
#anchor #script #konkani #poetry #presentation #competition #inaugural #function #sample