साहित्य

1 किलो कणगां

चून करपाक –

1/4 गोड 

1 नाल्लाची सोय 

7-8 वेलची 

थोड्यो काजू बियो

थोडे भाजपा पुरतें तूप वा तेल 

कृती 

कणगां धुवन कुकरान पांच – स सिटयो मारून उकडून घेवचीं. कणगां बरी मोव कुसकुशीत जाताच सोलून नितळ करचीं. नितळ केल्लीं कणगां पीठ मळटा तशें बरी मळून घेवचीं (जाय जाल्यार मळटना दोन – तीन चमचें गंवाचें वा मैद्याचें पीठ घालूं येता).

उपरांत गॅसार कायल दवरून गोड, सोय बरी तळसून घेवचें. तातूंत काजू बियांचे कुडके आनी वेलचेचो पिठो करून घालचो. चून तयार जाताच गॅस बंद करचो.

चून तयार जाताच नेवर्‍यांची पातीं करपाक घेवची (नेवर्‍यांची पातीं म्हळ्यार ल्हान – ल्हान नेवर्‍यांक गोल आकार थापून घेवप). पातीं करतना हाताक थोडें तूप वा तेल लावन मळिल्ल्या कणगांच्या पिठाचे गुळे हाताच्या तळटार थापून तांकां गोल भाकरेचो आकार दिवचो वा तसोच गोल आकार दिवपाक दुदाची रिती पोती वा हेर पातळ नितळ पोतयेचो वापर करून गोल आकार दिवं येता. 

ल्हान – ल्हान गोल आकार तयार जाताच तातूंत चून भरून नेवरी गच्च मोडून घेवची. मागीर गॅसार तवो दवरचो. तवो तापताच तव्यार नेवरी भाजपाक घालची. नेवर्‍यो भाजतना तूप वा तेल घालून परतून घेवचें. कणगां मोव – कुसकुशीत आशिल्ल्यान नेवर्‍यो सामक्यो किचकड नाजूक आसतात. नेवर्‍यो तव्यार परतितना मंद गतीन परतून घेवप गरजेचें. चपळायेन नेवर्‍यो परतिल्यार नेवर्‍यो तव्यार फुटून विस्कटपाक शकतात. 

मंद आचेर नेवर्‍यो तव्यार दोन – तीन मिणटां भाजून गॅस बंद करचो. नेवर्‍यो भाजतात कुसकुशीत गरम गरम नेवर्‍यांचेर ताव मारपाची मजा वेगळीच.

अतिशा सुर्लीकार