आर्मांद मिनेझीस – Armando Menezes

प्रो. आर्मांद मिनेझीस हांचो जल्म 11 मे 1902 दिसा गोंयच्या सां मातियस, दिवाडे ह्या गांवांत जालो. बी.ए., एम. ए. मेरेन तांणी शिक्षण घेतलां. नामनेचे शिक्षणतज्ञ, इंग्लीश कवी आनी लेखक अशी तांची वळख आसा.

मॅट्रीकेची परिक्षा वयाच्या 18व्या वर्सां ते बरे तरेन उतीर्ण जाले, उपरांत उंचेल्या शिक्षणा खातीर तांणी मुंबयच्या सेंट झेवियर्स कॉलेजींत प्रवेश घेतलो. थंय तांणी मुंबय विद्यापिठाची बी. ए. (पयल्या वर्गांत पयलो, ड्यूक ऑफ एडिंबरो फेलोशिप) आनी एम. ए. (कुलपतींच्या सुवर्ण पदका सयत) च्यो पदव्यो मेळयल्यो.

शिकप पुराय करतकच तांणी सेंट झेवियर्स म्हाविद्यालयांतूच अधिव्याख्यातो हें पद स्विकारून आपल्या अध्यापनाचे कार्यकिर्दीक सुरवात केली. 1924 ते 1939 हीं पंदरा वर्सां इंग्लिश आनी लॅटिन भाशांचे सहाय्यक प्राध्यापक म्हणून काम केले उपरांत ते सरकारी सेवेंत रुजू जाले. 1950 वर्सा सावन विविध सरकारी म्हाविद्यालयांनी प्राचार्य पदांचेर तांणी कार्य केलां. ते कर्नाटक विद्यापिठांतल्यान निवृत्त जाले. निवृत्ती उपरांत तांणी कांय वर्सां यू. जी. सी. प्रोफेसर म्हणून काम केलां. मुंबय (महाराष्ट्र), विसनगर (गुजरात), धारवाड (कर्नाटक) ह्या शारांनी तांणी सुमार 4 दसकां शिक्षण क्षेत्रांत सेवा दिली.

प्रो. आर्मांद मिनेझीस हांणी विविध सरकारी समित्यांचेर काम केलां. 1960 वर्सा तांची गोंयांत राजनैतीक पदाचेर नेमणूक जाल्ली, पूण पुर्तुगेज सरकारान ती नेमणूक मानून घेतली ना. देखून ते त्या पदाचेर वावर करूंक पावले नात.

तांणी विविध वर्गां खातीर क्रमीक पुस्तकां बरयल्यांत. तांच्या कवितांचीं आनी रेडिओ वयल्या भाशणांचीं पुस्तकां प्रसिद्ध जाल्यांत. तशेंच इंग्लिश साहित्या संदर्भांत समिक्षणात्मक लेख आनी पुस्तकां तांणी बरयल्यांत. कोंकणी भाशे विशीं तांकां उपाय आस्था आशिल्ली. कर्नाटक सरकारान हातांत घेतिल्ल्या ‘शून्य संपादनां’ ह्या पांच खंडांच्या संशोधन प्रकल्पाचे ते सह-संपादक आशिल्ले. ‘बसवण्णा’ च्या (वीरशैव धर्माचे संस्थापक बसवेश्वर) वचनांचो तांणी इंग्लिशींत अणकार केल्लो.

1942 वर्सा मुंबयंत जाल्ल्या तिसर्‍या अखिल भारतीय कोंकणी अधिवेशनाचे ते अध्यक्ष आशिल्ले.

2 जून 1983 दिसां ते संवसाराक अंतरले. ते 81 वर्सांचे आशिल्ले.