साहित्य

2/3  तोरां (हरवी आमली)

1 नाल्ल (सोय)

एक चमचो गोड

तेल

रुचीपुरतें मीठ

चिमटीभर हिंग

½ चमचो हळद, मिरसांगे पिठो, मिरयां

2 ते 3 तांबड्यो मिरसांगो,

½ चमचो उड्डाची दाळ, सांसवां, मेथी

थोडो करबेल

तोरांक आमसाण कमी आसल्यार रुचीपुरती आमटाण घालूं येता.

कृती
तोरां धुवन तासचीं आनी मीठ लावन दवरून फोण्णाची तयारी करची. गॅसार तोप दवरून तातूंत तेल, हिंग, मेथी, उड्डाची दाळ, सांसवां आनी करबेल घालून फोण्ण फडफडटाच चिरिल्लीं तोरां आनी उदक घालून पांच मिणटां सगळें मिश्रण शिजोवन घेवचें.
मुखार उड्डमेथीचें वांटण वांटप. वांटपाक सोय, मिरसांगेचो पिठो, हळदीचो पिठो, सुकी मिरसांग, मिरयां आनी अर्द कप उदक घालून मिक्सरान वांटून ते वांटण तयार करचें. उपरांत तेंच वांटण शिजिल्ल्या मिश्रणांत मिस्तूर करून, रुचीपुरतें मीठ, गोड घालून धा मिणटां बेस बरें गॅसार शिजोवचें. बरो खतखतो येताच गॅस बंद करून हुनहुनीत शितार आंबट – तिखट उड्डामेथीचेर ताव मारचो.

अतिशा सुर्लीकार