साहित्य

1/4 किलो अळसांदे 

1/2 किल कांदे 

1 टमाट (आवडी प्रमाणें)

1 बटाट (आवडी प्रमाणें)

1 नाल्लाची सोय

3 चमचे गरम मसालो (तुमच्या आवडी प्रमाणें तिखट कमी – चड पळोवन मसालो घालचो)

4 ते 5 लसणीच्यो बोयो 

2 चमचें तेल 

1/4 चमचो हळदीचो पिठो

थोडी ओली कोथमीर

(जाय जाल्यार तोंडाकाक बाजलेल्यो काजू बियो लेगीत घालूं येता. टमाट, बटाट चडशे तोंडाकाची चव वाडयतात तशेंच हे नग घातल्यार तोंडाकाचें प्रमाण वाडटा.)

कृती 

आदले रातीं अळसांदे फुगत घालप गरजेचें. दुसर्‍या दिसा ते अळसांदे फुगून आकार घेता. फुगयल्ले अळसांदे बरें धुवन कांदो, टमाट आनी बटाट चिरून कुकरांत शिजपाक घालचें. चार – पांच सिटयो येतांच कुकर बंद करचो. कुकराची वाफ वता म्हणसर वांटण तयार करचें. गॅसार कायल दवरून तातूंत एक चमचो तेल घालून तेल बरें गरम करचें. तेल गरम जाताच तातूंत लसणीच्यो बोयो सोलून बर्‍यो तळसून घेवच्यो. लसणी बोयांक भांगराळो कोर येताच दोन कांदे चिरून तातूंत तळसुपाक घालचें. कांदोय तेलांत बरो तळसून जाताच तातूंत सोय मिस्तूर करून तिनूय नग एकजीव करून मंद आचेर सोय पुडी रंगाची जायसर भाजून घेवचें. घातिल्ले नग बरें भाजून जाताच ते न्हिवपाक कुशीन दवरचें. भाजलेली सामग्री न्हिवताच मिक्सरांत हळद आनी गरम मसालो घालून मंद वांटून घेवचें. उपरांत एक – दोन कांदे बारीक चिरून दवरचे. कुकराची वाफ गेला काय ना ती पळोवन तोपांत चिरिल्लो कांदो, एक चमचो तेल घालून तळसून घेवचें. मंद आचेर कांद्यांक बरो तांबसो कोर येतासर तळशीत रावचें. कांदो तळशिताच शिजलेले अळसांदे आनी वांटलेलो मसालो, मीठ घालून मिस्तूर करून बरो चाळून घेवचें. पांच मिणटां तोंडाकाक खतखतो काडून गॅस बंद करूं येता. 

रुचीक तोंडाकाचो आस्वाद घेवपाक तें तोंडाक आमी पाव वा पुरयां बरोबर खावपाक शकतात.

अतिशा सुर्लीकार