हिंदू पंचांगा प्रमाणें चैत्र म्हयन्याच्या शुक्ल पक्षाच्या णवव्या दिसा राम नवमी मनयतात. शास्त्रा प्रमाणें ह्याच दिसा भगवान रामाचो जल्म जाल्लो, देखून हो दीस रामजन्मोत्सव म्हूण मनयतात. श्रीरामाच्या जल्मदिसाक लागून हे तिथीक रामनमी वा रामनवमी म्हणटात.

भगवान श्रीरामाक विष्णूचो अवतार मानतात. भगवान श्री विष्णू हांणी पृथ्वीचेर आशिल्ल्या राक्षसांक मारपा खातीर त्रेतायुगांत श्रीराम म्हूण मानवावतार घेतलो. भगवान श्रीरामाक मर्यादा पुरुषोत्तम अशें म्हणटात, कारण तांणी आपल्या जिवितांत जायत्या कश्टांक तोंड दिवन लेगीत गरिबीन भरिल्ले जिणेची व्हड देख दिली. प्रतिकूल परिस्थितींत लेगीत तांणी आपले आदर्श सोडले नात आनी स्वाभिमानान आपलें जिवीत जगलें. देखुनूच ताका श्रेश्ठ मनशाचें पद मेळ्ळां.

 ह्या दिसा भगवान श्रीरामाची पुजा करून आनी तरेकवार कार्यावळी घडोवन हाडून श्रीरामाचो जल्म मनयतात. भारतभर भगवान श्रीरामाचो वाडदीस उमेदीन मनयतात. पूण श्रीरामाचें जल्मस्थान अयोध्येंत व्हडा उमेदीन हो दीस मनयतात. रामनमी वेळार अयोध्येंत भव्य जात्रा घडोवन हाडटात. भारतभरच्या भक्तां सयत संन्यासीय श्रीरामाच्या जल्माची परब मनयतात.

सादारणपणान रामनमी दिसा हिंदू कुटुंबांत उपास, पुजा आनी हेर धर्मीक विधी करतात. श्रीरामाच्या जल्माच्या निमतान वेग-वेगळ्या देवळांनी पाळण्यांत रामजल्माचो देखाव घडोवन हाडटात. जायत्या घरांक-देवळांक खाशेल्या अलंकारांनी सजयतात.

माता कैकेयी हांणी श्रीरामाचो बापूय राजा दशरथ हाचे कडल्यान वरदान मागल्या उपरांत श्रीराम 14 वर्सां वनवासांत रावपाक गेल्ले. श्रीरामा वांगडा, ताची घरकान्न माता सीता आनी भाव लक्ष्मण वनवासांत गेल्लीं. थंय तांणी गर्विश्ट रावणा सयत जायत्या राक्षसांचो वध केल्लो. हाकाच लागून रामनमी दिसा श्रीरामा वांगडा तिगांचीय पुजा करतात.