दांतीं मांडटना
दांतीं मांडून दांत्या केले तिबे
पांचय देव उबे
आमच्या कारया लागीं
सोनयाचें दांतें गे
रुप्याचें खाणयें
आपले हातींत मांडलें गे
धरतरी वनदेवते मायेन.
आंदरी नी बोंदरी
बसूंक घाला शेंदरी मोतीयांची…
(संदर्भ – गोंयच्या लोकवेदाचो रुपकार, श्याम वेरेंकार)
सामार भाजतना
सुनियाची कायल गे
रुपयाची दवली (2)
सामार भाजिता गे
लक्ष्मी माया (2)
सुनियाची कायल गे
रुपयाची दवली (2)
सामार भाजिता गे
यजमान बाय (2)
दिश्ट काडटना
आरे आरे निमा
तूं आशिल्लो कोणा कडेन
हांव आशिल्लों बारा वर्सां
अनंता देवाच्या रावुळांत
रावुळ तशें कमळ
कमळ तशें निरमळ
हांव आशिल्लों…
(संदर्भ – गोंयच्या लोकवेदाचो रुपकार, श्याम वेरेंकार)
लग्न गीत
आओ बाप्पाचे गे पोटी
जल्मली गे पुतळी
कन्या दाना कोनळी,
धुवेन उडयली.
उबो जाल्ल्या मायेबाप्पा
सोड पाणियाच्यो धारो
लेक जाता परघरा
राज करूंक.
राज्य से करियता
काय लेकी मागसीं
दितां गे दितां तुका.
दारितलो माड…
आतां बाप्पा दितां म्हणशी
फाल्यां बाप्पा ना म्हणशी
जायेच्या झाडा खाला
बाप्पा विसरशी.
चांद सुरया दोगांय तुका
गवाय दिता…
(संदर्भ – गोंयच्या लोकवेदाचो रुपकार, श्याम वेरेंकार)
लग्न गीत
देवा माज्यो गणेसा गा
नग्ना आवतण
किरपा तुजी घरच्या पुरशा
घालतां मुळावण
देवळा फाटले गोटलिणी गे
दारीं फुलल्यो शेंवत्यो गे
राम बाये खुंटी कळयो
चिंता भरी करणी गे
चिंता भरी करणी
उट गे चिंते घालगे माळो
जालो नग्ना येळ बायो जालो नग्ना येळ
राम बसरे घोड्याशेर
बस गे चिंते हत्तीशेर
भांगराशें बाशिंग सामाळशें
फुलांची येणी फापुडया
तियांनी घालसो घोळ बायो तियांनी घालसो घोळ
वाजत रावन्या धोल सदीं वाजत रावन्या धोल
येयलीं चेडवां हांसत फुलत
वळेसरांसो वास गे
कान फुट्टाय नोकांसो बोवाळ
धेडो रागान फुगलेलो गे
धेडो रागान फुगलेलो
कांशाची गे वाटली
लोकणाची गे बालदी
आम्याच्या पानांनी नेसयाली गे सये नेसयाली
कापसिनीच्या सुतान गे सये बांदयाली गे सये बांदयाली
आपल्या दुयेली नाल्लाचें गे तेल
मादेवा देवा – गे पार्वती माये
इटोबा देवा – गे रुकमीणी माये
बरमा देवा – गे सरस्पती माये
गणपती देवा – गे बुद्धी माये
इष्णू देवा – गे नक्षीमी माये
त्यो पाचू चालोनी येयावो
नवऱ्या तेनी तेलाक वो
चुडयाती पांच पारा राती गे
पांच पारा राती
संदर्भ – लोक वेद एक लोकजीण, श्रीनिवास प्रभू देसाय, रिवण