प्रा. रामदास  केळकार

खयंचोय फांटो घेयात, भास ही जायच. ती मागीर स्थानीक आसूं ना जाल्यार गिरायकांची भास आसूं. ते भायर आनीक भास आयल्यार ताचो तुमकां चड लाव जावपाक शकता. भास शिकपा खातीर जरी तुमकां शाळा वा कॉलेजांनी वचप गरजेचें आसले तरी प्रयत्न करीत जाल्यार खंयचीय भास शिकप कठीण ना. आतां तर इंटरनॅटाच्या माध्यमांतल्यान भास शिकप खूबच सोंपें जालां. पर्यटनाचे नदरेन पळोवपाक गेल्यार चड भास येवप हें तुमच्या वेवसायाक यशाक आनीक हातभार लायता, हे आमी विसरूंक शकना. गोंयांत शिकपी भुरगो इंग्लीश, राजभास कोंकणी, सहभास मराठी आनी शाळेंत शिकपाक मेळपी हिन्दी भास सहजपणान शिकूंक शकता. पूण जर तुमकां विदेशांत वचपाक जाय तर विदेशी भास शिकपूय गरजेचे थारता. 

भास खर्‍या अर्थान शिकपा खातीर जीं माध्यमां म्हत्वाचीं आसता तातूंत आयकप, बरोवप, उलोवप आनी चिंतप हांचो आसपाव आसा. चडशे जाण उलोवपाक भर दिवन ती भास सहज उलोवपाक शकतात. तुमी विदेशी गिरायकां वांगडा उलोवपी स्थानीक तशेंच गोंया भायले लोक पळयलां आसतले. हातूंत ते भास शिकले अशें म्हणूंक शकनात. वेवहाराची गरज म्हूण आमी ती उलयतात. पूण जर तुमकां अणकार ह्या विशयांत करियर करपाचें आसल्यार तुमकां ती भास गांभीर्यान शिकची पडटली. खंयची भास शिकतना तुमकां ते ते भाशेचे शब्दकोश तुमच्या वापरांत हाडचें पडटलें. ह्या खेरीज, समांतर शब्दांचो शब्दकोशूय  तुमच्या संग्रहाक आसपाक जाय. अशे तरेन तुमी भास शिकपाची तयारी करूंक शकतात. पूण उलोवपा खातीर तुमकां मार्गदर्शकाची गरज पडूं येता. विज्ञान फांटो सोडल्यार हेर फांट्याच्या विद्यार्थ्यांक वाचन करपाक भरपूर वेळ मेळटा. म्हूण तर हेर फांट्याच्या विद्यार्थ्यांक भाशे भितर करियर करपाक भरपूर संदी मेळटात. अभ्यासक्रमान जांचो आसपाव आसता तीं पुस्तकां सोडून वाचनालयांत मेळपी विंगड विंगड विशयाचीं साबार पुस्तकां तो वाचपाक शकता. भाशा बरी येवपाक तुमचें वाचन बरें आसपाक जाय जाका लागून तुमकां नवे शब्द, वाक्य रचना वाचपाक मेळटली. भास शिकतना तुमी वांगडा बरोवपा खातीर पेन, पुस्तक दवरपाक जाय. नवीं उतरां बरोवन दवरप हाची संवय लावन दवरपाक जाय. आनी तीं उतरां तुमच्या उलोवपांत हाडपाक विसरूं नाकात. अशी सुरवात करशात तर काय दिसांनी तुमच्या उलोवपांत बदल दिसपाक लागतलो.

विज्ञान फांट्याच्या विद्यार्थ्यांक दीसभर चलपी अभ्यासाक लागून मनांत आसुनूय हेर वाचन करप शक्य जायना. पूण जर तांकां भाशे भितर करियर करपाक जाय तर ते उसरां हें करूंक शकतात. खंयचेय भाशेंन करियर करपा खातीर पदव्युत्तर मेरेनचें शिक्षण आसप सदांच बरें. गोंय विद्यापिठांत हिन्दी, मराठी, कोंकणी, इंग्लीश सारक्या मुखेल भाशांनी पदव्युत्तर शिक्षण घेवपाची सुविधा आसा. भास शिकतना ते भाशेंतलें दिसाळें वाचप तुमकां खूब फायदेशीर थारतले. एक म्हळ्यार नवीं उतरां तर कळतलींच ते शिवाय तुमकां चालू घडामोडी कळपाक हाचो लाव जातलो. सद्या ऑनलायन पद्धतीनय एकाद्री भास तुमी शिकूंक शकतात. गोंयांत पुर्तुगेज, फ्रँच सारक्यो भास मार्गदर्शकां वरवीं शिकपाची सुविधा आसा.