डॉ. भीमराव आंबेडकर हांकां बाबासाहेब आंबेडकर ह्या नांवानूय वळखतात. स्वतंत्र भारताचे संविधान निर्माते, दलितांचे कैवारी आनी राष्ट्रीय फुडारी म्हणुनूय तांची नामना आसा. समाजीक भेदभाव, अपमान अशे जायते त्रास सोंसून समाजांत बदल घडोवन हाडपा खातीर तांणी खूब परिश्रम घेतले. आंबेडकर हांकां भारतीय संविधानाचे शिल्पकार म्हणुनूय वळखतात. तांणी तयार केल्ल्या संविधानांत धर्म, जात-पात हातूंतल्यान भायर सरून दरेका नागरिकाक स्वातंत्र्य मेळपाचेर भर दिला.

डॉ. बाबासाहेब आंबेडकर हाचो जल्म मध्य प्रदेशांतल्या इंदौरा लागीं आशिल्ल्या माहू गांवांत 14 एप्रील 1891 दिसा जालो. त्या वेळार भारतीयांचेर ब्रिटीशांची सत्ता चलताली. आंबेडकराचें जल्म नांव भीम सकपाल. तांचो बापूय रामजी मालोजी भारतीय सैन्यांत सुबेदार आशिल्लो. तांचे आवयचें नांव भीमाबाई. आंबेडकर 6 वर्सांचे आसतना ताचे आवयक मरण आयलें.

ताच्या सगळ्या भावंडां मदीं आंबेडकर हे एकलेच उच्च शिक्षण घेतिल्ले आशिल्ले. मॅट्रीक परिक्षा पास जातकच तांणी त्याच म्हाविद्यालयांतल्यान मुंबई विद्यापिठाची पदवी मेळयली आनी थंय तांणी अर्थशास्त्र आनी राजकारण शास्त्रांतली पदवी मेळयली. आंबेडकर हांकां सयाजीराव गायकवाड हांणी स्थापन केल्ले येवजणे खाला शिश्यवृत्ती मेळ्ळी आनी ते न्यूयॉर्कांतल्या कोलंबिया विद्यापिठांत अर्थशास्त्राचो अभ्यास करपा खातीर गेले. जून 1915त अर्थशास्त्रा वांगडाच तांणी इतिहास, समाजशास्त्र, तत्वगिन्यान, राजकारण ह्या विशयांनीय पदवी मेळयली.

भारतांत परत येतकच तांणी लोकांक वंशीक भेदभावा आड झुजपा खातीर प्रेरणा दिली आनी तांकां एकठांय हाडले. ह्या वावरांत तांकां खूबदां समाजांतल्या विरोधाक तोंड दिवचें पडटालें. भारताच्या स्वातंत्र्या उपरांत तांणी दलीत समाजांतल्या लोकांक आरक्षणाची मागणी केली. डॉ. बाबासाहेब आंबेडकर हांणी महात्मा गांधींचे हरिजन चळवळींत वांटो घेतिल्लो. भारतांतल्या मागास वर्गीय लोकांक भोगचे पडटात त्या समाजीक अन्याया आड ते पेटून उठले. देशांतल्यान अस्पृश्यताय ना करपा खातीर आंबेडकर हांचो म्हत्वाचो वावर आसा.

भारताच्या स्वातंत्र्या उपरांत 29 ऑगस्ट 1947 दिसा भारताच्या संविधानाचो मसुदो तयार करपाचे समितीचो अध्यक्ष म्हणून ताची नेमणूक जाली. जातीभेद ना करून सगळ्यांक समान हक्क दिवप हो देशाचें संविधान तयार करपाचो ताचो मुखेल हेत आशिल्लो. भीमराव आंबेडकर हांणी दलितांक शिक्षणीक आनी सरकारी नोकऱ्यांनी खाशेलें आरक्षण दिलें. सुमार 2 वर्सां 11 म्हयने आनी 7 दीस कश्ट करून देशाचें संविधान तयार जालें. आनी 26 जानेवारी 1950 दिसा हें संविधान चालीक लायलें.

1954 आनी 1955 वर्सा डॉ. आंबेडकर हांची भलायकी ल्हव ल्हव इबाडूंक लागली. मरणाच्या 2 म्हयन्यां आदीं तांणी हिंदू धर्मांतल्यान बौध्द धर्म आपणायलो. हे घडणुकेच्या दोन म्हयन्यां उपरांत, 6 डिसेंबर 1956 दिसा तांणी दिल्लींत निमाणो स्वास घेतलो.