(अखिल भारतीय कोंकणी परिशदेच्या 33 अधिवेशनाच्या समारोप सुवाळ्या वेळा वयलें सुत्रसंचालन)

नमस्कार

33 वें अखिल भारतीय कोंकणी परिशदेच्या समारोप सुवाळ्याक हांव स्नेहा, तुमकां सगळ्यांक मायेमोगाचो येवकार दितां.

समारोप सुवाळ्याक आमचे मदीं उपस्थीत आसात परिशदेचे अध्यक्ष भोवमानेस्त फा. मोउजीञबाब आतायद, मुखेल सोयरे म्हणून उपस्थीत आसात उद्देजक आनी फोमेंतो उद्देग समुहाचे चॅरमॅन भौ. अवधूतबाब तिंबलो.

हांव मागतां येवकाराध्यक्ष प्रशांतबाब नायक, कार्याध्यक्ष चेतनबाब आचार्य, भांडारी शिरीश पै आनी सचीव मंगलदास भट हांकां तांणी मानेस्तांक मानान माचयेर हाडचे आनी माचयेर बसका घेवची.

येवकार वा अवकार ह्या शब्दाचो अर्थ आमकां काल उक्तावण सुवाळ्याचे मुखेल सोयरे भौ. डॉ. गणेशबाब देवी हांणी सांगलें. कोंकणी मनशाचें उकतें आनी आपलेपणाचें मन दाखोवपी हें कोंकणी उतर. हेंच आपलेपण दोन दिसांच्या ह्या अधिवेशनांत आमकां सगळ्यांक अणभवंक मेळ्ळे हाची म्हाका खात्री आसा.

फुडले सुवातेर हांव मागतां अधिवेशनाचें येवकाराध्यक्ष प्रशांतबाब नायक हांचे कडेन, तुमी येवकाराचें उलोवप करचें.

ह्या सुवाळ्याचे यादींचें फूल मानेस्तांच्या मनांत धोलचें म्हणून हांव मागतां परिशदेचे भाडारी शिरीशबाब पै हांचे कडेन तुमी मुखेल सोयरे भौ अवधूतबाब तिंबलो हांकां फुलां तुरो भेटोवन येवकार दिवचो.

देव बरे करूं

घेवन चुडी, मार उडी

जैताची हांडूक घुडी

चल रे पेवन पलतडीं

हीं उर्बेचीं उतरां कविवर्य शंकर भांडारी हांणी कोंकणी भौसाक दिली.

गोंय, कारवार, मंगळूर, कोची, मुंबय, गडींगलज अशा विंगड विंगड वाठारांनी पसरिल्लो कोंकणी समाज आयज 33 व्या अखिल भारतीय कोंकणी परिशदेच्या अधिवेशनाक हांगा एकठांय आयला. अधिवेशना निमतान कोंकणी समाजाच्या प्रस्नांचेर भासाभास जावची, तांचेर उपाय मेळचे ह्या उद्देशान फाटल्या साबार म्हयन्यां सावन परिशद वावुरता. अधिवेशनाचो हो भार आपल्या खांद्यार पेलपी आनी सगळ्यांक एकवटान मुखार घेवन वचपी चेतनबाब आचार्य हांचे कडेन हांव मागतां तुमी आपलें उलोवप करचें.

कोंकणी भास, संस्कृताय, साहित्य तशेंच कोंकणी समाजाक हिताचो थारपी असो वावर करपी कोंकणी मनशांचो आयज अखिल भारतीय कोंकणी परिशद भोवमान करता. कोंकणी चळवळींत आनी संस्कृतायेच्या वावरांत मोलादीक योगदान दिवपी भौ. ॲड सुहासबाब दलाल, भौ. अमेलियाबाय डायस आनी भौ. फा. जैमबाब कुतो ह्या तीन मानेस्तांचो मुखेल सोयरे भौ. अवधूतबाब तिंबलो हांचे हस्तुकीं भोवमान जाता.

जनमत कौल आंदोलना वेळार परमळ हो अंक काडून कोंकणी समाजा मदीं भाशेचें आनी गोंय वेगळें उरचें हाचेर जागृताय घडोवन हाडपी भौ. ॲड. सुहासबाब दलाल. सुहासबाब दलाल हे पेश्यांत वकील. पूण हाचे परस चड ते एक निश्ठावंत कोंकणी सेवक. अंतर्स्कणा सावन पुजा करतलो जाल्यार पुजेच्या श्लोकांचो अर्थ आदीं आपणाक कळूंक जाय ह्या विचारांचे भौ. सुहासबाब दलाल हांणी गणेश पुजा धरून जायतीं आरती, अभंग आनी भक्तीं गितांचीं पुस्तकां काडलीं. कोंकणी भाशेक दिल्ले सेवे खातीर कोंकणी भाशा मंडळ, विश्व कोंकणी केंद्रान तांचो खासा पुरस्कार दिवन भोवमान केला. आयज अखिल भारतीय कोंकणी परिशद ह्या अधिवेशनान तांचो भोवमान करता.

हांव मागतां मुखेल सोयरे भौ. अवधूतबाब तिंबलो हांचे कडेन तांणी भौ. सुहासबाब दलाल हांचो भोवमान करचो.

भौ. सुहासबाब दलाल, आमी तुमचे उपकारी आसात. तुमी हो मान आमचे कडल्यान स्विकारलो.

फुडले सुवातेर, अमेलियाबाय डायस हांचो आमी भोवमान करतात. 1971 वर्सा केणयाभाट महिला मंडळाची स्थापना जाली. अमेलियाबाय डायस हांच्या फुडारपणा खाला हो पंगड सातत्यान वावर करीत आसा. संवसारांतल्या वेगळ्या वेगळ्या वाठारांनी धालो, फुगडी हे लोकनाच हो पंगड सादर करता. राजस्थान, नवी दिल्ली, महाराष्ट्र, हिमाचल प्रदेश अश्या राज्यांनी वचून गोंयचो लोकनाच सादर करून गोंयचे संस्कृतायेचें दर्शन हो पंगड घडयता. ह्या पंगडांत अमेलिया डायस हांचो खूब म्हत्वाचो वावर आसा. भारत आनी सोवियत युनियन हांचे मदीं सांस्कृतीक दिवप-घेवप हाचो भाग म्हणून फॅस्टिव्हल ऑफ इंडिया हो महोत्सव USSR जाता. ह्या महोत्सवांत तांणी लोकनाच सादर करून कोंकणी समाजाचें नांव वयर काडलां. अमेलियाबाय डायस हांचो आयज भोवमान जाता. हांव मागतां, भौ. अमेलियाबाय डायस हांणी हो मान माचयेर येवन स्विकारचो.

देव बरें करूं.

मुखार, फा. जैमबाब कुतो हांचो भोवमान जाता. एक भास, एक लिपी हो मंत्र आपणावपी आनी तटस्थपणान, निर्भीडपणान आपलीं मतां मांडपी अशें हें व्यक्तीमत्व. कोंकणी भास, फुलची म्हणून तांणी देवनागरींतल्यान अंक चलयले. सध्या ते दाल्गादाचो संदेश हो अंक चलता. पिरायेच्या सुमार 90 वर्सांचेर सुद्धा ते कोंकणी खातीर वावर करीत आसात. राशोल सेमिनारींत ते प्राध्यापक आशिल्ले. शिक्षणांत मुळाव्या पांवड्यार कोंकणी भास माध्यम भास आसची म्हणून ते प्रामाणीकपणान वावुरतात. थळावी भास, आवय भास आनी थळावी संस्कृताय हाची उदरगत करपाचें कर्तव्य राज्याचें आसा, अशें ते म्हणटात. पूण फकत सरकाराचेर निंबून राविनासतना ते कोंकणी खातीर आपलो वावर करीत आसात. फा. जैमबाब कुतो तुमी हो मान स्विकारचो अशें तुमचे कडेन मागतां.

देव बरें करूं.

कोंकणी समाजा खातीर वावुरपी आनी समाजीक जाणीव आशिल्लें व्यक्तीमत्व म्हणल्यार आमचे आयचे मुखेल सोयरे भौ. अवधूतबाब तिंबलो. हांव मागतां, भौ. अवधूतबाब तिंबलो हांचे कडेन तुमी आपले विचार हांगा व्यक्त करचे.

देव बरें करूं अवधूतबाब.

कोंकणी मनीस हो भोवभाशीक. पूण कितल्योय भाशा आयल्यो तरी, आमचे पांय, आमचें मूळ हें कोंकणींत आसपाक जाय असो मंत्र तुमी आमकां दिलो. तुमचे देव बरें करूं.

फा. मोवजीञबाब आतायद हांचे अध्यक्षते खाला दोन दिसांचें 33वें अधिवेशन चल्लें. ह्या अखिल भारतीय कोंकणी परिशदेच्या 33व्या अधिवेशनाचे अध्यक्ष फा. मोवजीञबाब आतायद हांव तुमचे लागीं मागतां, तुमी हांगा मनोगत व्यक्त करचें.

देव बरें करूं भौ. मोवजीञबाब.

कोंकणी भास, साहित्य, संस्कृताय, कोंकणी समाजा खातीर वावुरपाक फकत हे मानेस्त न्हय तर प्रत्येक कोंकणी वावुरपी, कोंकणी तरणाटे तुमचे वांगडा आसात. कोंकणीची घुडी मुखार व्हरपाक आमी उतर दितात, कोंकणी खातीर आमी सातत्यान प्रयत्न करीत रावतलीं.

अधिवेशनाची ही गोड याद आमच्या मानेस्तांचे यादींत सदांच उरची म्हणून हांव मागतां अधिवेशनाचे येवकाराध्यक्ष प्रशांतबाब नायक, तांणी भौ. अवधूतबाब तिंबलो हांकां मानचिन्न भेटोवचें. तशेंच परिशदेचे कार्याध्यक्ष भौ. चेतन आचार्य, परिशदेचे भांडारी शिरीशबाब पै आनी अधिवेशनाचे सचीव भौ. मंगलदासबाब भट हांकांय मोगाची भेट भेटोवची.

देव बरें करूं.

ही कार्यावळ यशस्वी करूंक परिशदेक साबार संस्थांनी आनी व्यक्तींनी मोलादीक आदार दिला. हांव मागतां अधिवेशनाचे सचीव भौ. मंगलदासबाब भट हांचे कडेन तुमी उपकाराचें उलोवप करचें.

देव बरें करूं.

ही कार्यावळ हांगा सोंपली अशें जाहीर करतां. देव बरें करूं.

CONTRIBUTED BY SNEHA SABNIS