सगळ्यांक मायेमोगाचो नमस्कार आनी येवकार.
कोंकणी भास तिगची, फळची म्हणून वावर केल्ल्या आनी तरणाटे पिळगेक प्रेरणा दिवपी कोंकणीच्या निश्ठावंत आनी प्रामाणीक कार्यकर्त्यांक मान दिवपाचो आयचो हो दीस. ह्या सुवाळ्याक हांव स्नेहा सबनीस तुमकां सगळ्यांक येवकार दितां.
मोहिनी स्मृती पुरस्कार भेटवण सुवाळ्याक आज आमकां मुखेल सोयरे म्हणून लाबल्यात कोंकणी म्हालगडे आनी ज्येश्ठ साहित्यीक ॲड. उदयबाब भेंब्रे, तशेंच मानाचे सोयरे म्हणून लाबल्यात राजहंस वितरणाचे सर्वेसर्वा आनी बालसाहित्याच्या मळार म्हत्वाचो वावर करपी प्रभाकरबाब भिडे. ह्या सुवाळ्याचे अध्यक्षपद सांबाळटात गोंय विद्यापिठांत गोवा बिजनस अध्ययन शाखेच्या कम्प्युटर सायन्स विभागांत प्राध्यापक म्हणून वावर करपी श्री. रामदासबाब करमली. मोहिनी स्मृती पुरस्काराचे मानकरी व्याकरणकार सुरेशबाब बोरकार. हांव मागतां, संजना पब्लिकेशन्साचे दिनेशबाब मणेरकार हांचे लागीं, तांणी मानेस्तांक माचयेर घेवन येवचे.
सर्गेस्त नागेशबाब करमली आनी तांच्या घरच्यांनी, नागेशबाबांची घरकान्न सर्गेस्त मोहिनीबाय करमली हांच्या उगडासान हो पुरस्कार दवरला. नागेशबाब करमली हांणी गोंय मुक्ती लढो तशेंच कोंकणी भाशीक आनी साहित्यीक चळवळींत भोवमोलादीक वावर केला. तांच्या ह्या वावरांत मोहिनीबाय करमली हांणी सदांच आदार दिला, तांकां तेंको दिला. अप्रत्यक्षपणान पळयल्यार, तांणीय बी हे चळवळींत, ह्या लढ्यांत भोवमोलादीक हातभार लायला.
ह्या खिणाक आमी सर्गेस्त नागेशबाब करमली आनी सर्गेस्त मोहिनीबाय करमली हांकां नमन करतात आनी कार्यावळ मुखार व्हरतां.
हांव मागतां, संजना पब्लिकेन्साचे दिनेशबाब मणेरकार हांचे लागीं तांणी येवकाराचें उलोवप करचें.
देव बरें करूं दिनेशबाब.
आमच्या काळजांतल्या मोगाचो परमळ आयच्या मानेस्ता मेरेन पावचो म्हणून आमच्या मानेस्तांक आमी फुलांनी येवकार दिवया. हांव मागतां, नागेशबाब करमली हांची नात आयशा करमली हांचे लागीं तांणी आयचे मुखेल सोयरे ॲड. उदयबाब करमली हांकां फुलां तुरो भेटोवन येवकार दिवचो. फुडले सुवातेर हांव मागतां, नागेशबाब करमली हांचो नातू हरीश वेळुस्कार हांचे लागीं, तांणी मानाचे सोयरे भौ. प्रभाकरबाब भिडे हांकांय फुलांनी येवकार दिवचो. मोहिनी स्मृती पुरस्काराचे मानकरी भौ. सुरेशबाब बोरकार हांकांय आमी फुलांनी येवकार दिवया. मागतां आयशा करमली हांचे लागीं तांणी फुलां तुरो दिवन सुरेशबाबांक येवकार दिवचो. हरीश वेळुस्कार हांचे लागीं मागतां, आयचे कार्यावळीचे अध्यक्ष रामदासबाब करमली हांकांय फुलांनी येवकार दिवचो. देव बरें करूं.
केन्नाय खंयूय मेळ्ळ्यार, सध्या किदें बरयता, आमची किदेंय मदत लागल्यार सांग अशें मायेन सांगपी आनी युवा पिळगेक प्रोत्साहन दिवपी प्रभाकरबाब भिडे. प्रभाकरबाब भिडे तशेंच दिनेशबाब मणेरकार सारकिले प्रकाशक आसात म्हणटकच कोंकणी साहित्याक आनी कोंकणी शिक्षणीक साहित्याक प्रकाशनाचो कसलोच हुस्को ना. ह्या समयार हांव मागतां प्रभाकरबाब भिडे हांचे लागीं, तांणी आपलें उलोवप करचें.
प्रभाकरबाब भिडे हांणी सुरेशबाब बोरकार हांचें पुराय जिवीत आनी तांच्या वावरा विशीं खोलायेन सांगलें. देव बरें करूं प्रभाकरबाब.
आतां ज्या खिणाक आमी रावल्यात, मोहिनी स्मृती पुरस्कार भेटवण. हांव मागतां सगळ्या मानेस्तां लागीं, ह्या पुरस्काराचे मानकरी सुरेशबाब बोरकार हांकां हो पुरस्कार भेटोवचो आनी ह्या पुरस्काराचोय मान वाडोवचो.
कोंकणी शिक्षक, व्याकरणकार, कोशकार भौ. सुरेशबाब बोरकार. कोंकणी, हिन्दी, मराठी, पुर्तुगेज, अश्या वेगवेगळ्या भाशांचेर तांचें वर्चस्व आसा. भुरग्यां मदीं कोंकणी भाशेची आवड रुजोवपी, कोंकणी शिक्षणाक लागपी म्हत्वाचीं पुस्तकां रचपी भौ. सुरेशबाब बोरकार हांचो मोहिनी स्मृती पुरस्कार भेटोवन भोवमान जाता.
हांव मागतां, ॲड. उदयबाब भेंब्रे हांचे लागीं, भौ. सुरेशबाब बोरकार हांचो भोवमान करचो. शाल, श्रीफळ, मानपत्र आनी 30000 रुपया अशें पुरस्काराचें स्वरूप आसा.
हांव मागतां, नागेश करमली हांच्या घरच्यां लागीं तांणी माचयेर येवचें.
हांव मागतां, भौ. सुरेशबाब बोरकार हांचे लागीं, तांणी आपलें मनोगत व्यक्त करचें.
देव बरें करूं सुरेशबाब.
ह्या समयार हांव मागतां, कोंकणी म्हालगडे आनी आमचें प्रेरणास्थान भौ. ॲड. उदयबाब भेंब्रे हांचे लागीं, तांणी आपलें उलोवप करचें.
उदयबाब तुमकां देव बरें करूं. कोंकणी संघर्शाचें पर्व तुमी आमचे मुखार दवरलें तशेंच फुडाराक येवपी संकश्टाचीय जाणीव तुमी आमकां करून दिली.
आमचे मदीं आसात, भौ. नागेशबाब करमली हांचे पूत भौ. रामदासबाब करमली. हांव मागतां भौ. रामदासबाब करमली हांचे लागीं, तांणी अध्यक्षीय उलोवप करचें.
देव बरें करूं रामदासबाब करमली. सगळ्या मानेस्तांचे आमी उपकारी आसात. हो पुरस्कार, हो मान स्विकारिल्ले खातीर भौ. सुरेशबाब बोरकार तुमचेय आमी उपकार मागनात. तशेंच हे कार्यावळीक व्हडा संख्येन जमिल्ल्या तुमकां सगळ्यांक संजना पब्लिकेन्साचे वतीन हांव तुमचेय उपकार मानतां. तशेंच नागेशबाब करमली हांचीं घरचीं आनी सुरेशबाब बोरकार हांचीं घरचीं हांगा उपस्थीत आसा. तुमकां देव बरें करूं. फोटोग्राफी, व्हिडियोग्राफी सांबाळपी, सगळे पत्रकार तुमकांय चडांत चड देव बरें करूं.
मानेस्तांचे मान्यतायेन ही कार्यावळ हांगा सोंपली अशें जाहीर करतां. देव बरें करूं.
Contributed by Sneha Sabnis
Contributed by Govind Mopkar
#anchor #script #konkani #award #function #felicitation #sample