प्रकाश पाडगांवकार – Prakash Padgaonkar

प्रकाश पाडगांवकार हांचो जल्म 4 डिसेंबर 1948 दिसा जालो.

पिरायेच्या 14 वर्सांचेर मावजो स्टुडियोंतल्यान प्रकाश पाडगांवकार हांणी आपल्या कामाची सुरवात केली. मात आपलें शिक्षण चालू दवरलें. उपरांत आकाशवाणी पणजी केंद्राचेर नोकरी घेतली आनी त्याच वेळार आपलें पदवी शिक्षण पुराय करून रोखडेच ते वास्को एम.एम.टी.सी हांगा कनिश्ठ सहाय्यक म्हणून रुजू जाले. मावजो स्टुडियोंत आसतना तांकां कोंकणीचो दिश्टावो घडलो आनी ते कोंकणींतल्यान बरोवंक लागले. आपले कवितेंतल्यान तांणी चिडिल्ल्या माडिल्ल्या लोकांच्यो व्यथा मांडल्यो. तांच्यो कविता फिलॉजॉफीकल आसुनूय आधुनिकतायेचो थाव घेवपी आसात. तांणी उपरांतच्या काळांत बरयल्ल्या अध्यात्मीक पांवड्या वयल्या कवितांनी कोंकणी साहित्याक गिरेस्त केला. स्वता वांगडाच ह्या समाजाच्या वेगळ्या वेगळ्या घटकांच्या मनाचो थाव घेतना मनीसपण सोदपी तांच्यो कविता आसात.

कोंकणी सयत मराठींतूय तांणी काव्य-लिखाण केलां. तांच्या कोंकणी कवितांचे अणकार इंग्लीश आनी हेर भारतीय भाशांच्या नेमाळ्यांनी उजवाडाक आयल्यात. I am Man Ashwatthaman (2017) आनी चिरंतन ब्रह्मांड योगी (हिंदी) (2019) हीं तांचीं दोन पुस्तकां इंग्लीश आनी हिंदी भाशेंत अणकारीत जाल्यांत. कोंकणी पाठ्यपुस्तकांनी ताच्या कवितांचो आस्पाव जाला.

डॉ. चंद्रलेखा डिसोझा हांणी धर्मवीर भारती आनी प्रकाश पाडगांवकार हांच्या कवितांचो तुलनात्मक अध्ययन करून गोंय विद्यापिठांतल्यान पीएच.डी. पदवी प्राप्त केल्या.

हांव मनीस अश्र्वत्थामो ह्या कविता संग्रहा खातीर तांकां 1986 वर्सा केंद्रीय साहित्य अकादेमी पुरस्कार फावो जाला. तशेंच व्हांवती न्हंय काळाची ह्या पुस्तका खातीर तांकां 2005 वर्सा डॉ. टी.एम.ए. पै फावंडेशन पुरस्कार प्राप्त जाला. वास्कोयन आनी हांव मनीस अश्वत्थामो ह्या पुस्तकां खातीर तांकां कला आकादेमी पुरस्कार दोन फावटी फावो जाल्यात. गोंय सरकाराचो  2007 वर्साचो राज्य सन्मान आनी 2010 वर्साचो उत्कृश्ट साहित्या खातीर सांस्कृतीक पुरस्कार तांकां फावो जाला. तशेंच कोंकणी भाशा मंडळ, गोंय, गोवा कोंकणी अकादेमी ह्या संस्थांचो पुरस्कार तांकां लाबला. 2010 वर्सा तांकां बिम्ब पुरस्कारय फावो जाला.

2015 वर्सा केरळांतल्या कोईकोड वाठारांत जाल्ल्या 22व्या अखिल भारतीय कोंकणी साहित्य संमेलनाचे ते अध्यक्ष आशिल्ले.

प्रकाश पाडगांवकार हांकां 30 एप्रील दिसा मरण आयलें.

• ग्रंथ सुची-
• उजवाडाचीं पावलां (1976)
• वास्कोयन (1977)
• हांव मनीस अश्वत्थामो (1985)
• कविता : काळ रेल्वेच्यो, मन-हारशांच्यो, पावस-पाणयाच्यो (1993)
• सर्ग घडपाक धर्तरेचो (1994)
• व्हांवती न्हंय काळाची (2003)
• ब्रह्मांड-योगी चिरंतनाचो (2007)
• पुनरार्थोपनिशद (2014)
• देवाचें चान्नें (2016)
• दाण्या येदी धर्तरी (2020)
• सम्राट अशोक (मरणा उपरांत प्रकाशीत महाकाव्य – 2022)

Contributed by Sneha Sabnis

#Konkani #writer #biodata #information #PrakashPadgaonkar