पी. जी. कामत – P. G. Kamath

पद्मनाभ गोपाळकृष्ण कामत हांचो जल्म 28 फेब्रुवारी 1926 दिसा केरळांतल्या थुरवू गांवांत जालो. एक शिक्षक, कवी, अनुवादक आनी शिक्षणतज्ञ म्हणून ते प्रसिद्ध आशिल्ले.

तांचें शिक्षण गांवांतल्याच टी.डी. शाळेंत जालें आनी देवळांतले पाठशाळेंत तांणी संस्कृत भाशेचें शिक्षण घेतलें. तांकां कोंकणी, संस्कृत, मलयाळम, हिंदी, पाली, प्राकृत, इंग्लीश अश्या साबार भाशांचें गिन्यान आसलें.

विज्ञान शाखेंतल्यान पदवी मेळयले उपरांत तांच्या शिक्षण क्षेत्रांतल्या वावराक सुरवात जाली. बनारस हिंदू विद्यापिठांतल्यान तांणी एम. ए. हिंदी शिक्षण मेळयलें. 33 वर्सां तांणी केरळांत शिक्षण क्षेत्रांत वावर केलो आनी 1981 वर्सा हिंदी शिक्षण अधिकारी म्हणून ते निवृत्त जाले. रामवर्मापुरम हिंदी प्रशिक्षण संस्थेचे ते प्राचार्य आशिल्ले. हिंदी मुल्यांकनांत तांणी आधुनीक पद्दती हाडल्यो.

लिपि – एक शास्त्रीय चिंतन हें तांचें म्हत्वाचें पुस्तक. ताचो इंग्लीश भाशेंत अणकार जाला. पवळीं आनी ओळख हे तांचे कविता झेले प्रकाशीत जाल्यात. ओळख हो कविता झेलो तांच्या मरणा उपरांत प्रकाशीत जाला. अणकाराच्या मळार तांचें भरीव योगदान आसा. मलयाळम, कोंकणी, हिंदी आनी इंग्लिश ह्या भाशांनी ते अणकाराचें काम करताले. र. वि. पंडीत हांच्या भुरग्यालो जाग ह्या पुस्तकाचो हिंदी अणकार, स्वामीजीच्या गीता व्याख्यानांचो कोंकणी अणकार, डॉ. हजारी प्रसाद द्विवेदी हांच्या साहित्य का मर्म ह्या हिंदी लेखांचो मलयाळम अणकार, बुद्ध धर्मपदाचो मलयाळम अणकार, विकी कॉलिंस हांचे इंग्लिश कादंबरीचो मलयाळम अणकार, एडगर एलन पोय हांचे कादंबरीचो मलयाळण अणकार हे तांचे कांय अणकार.

अन्य भाशा शिक्षण ह्या तांच्या पुस्तकाक 1972 वर्सा केंद्र सरकाराचो पुरस्कार फावो जाला. ते केरळ कोंकणी अकादमीचे अध्यक्ष (1985-2001) आशिल्ले तशेंच केंद्रीय साहित्य अकादेमीच्या कोंकणी सल्लागार मंडळाचे वांगडी (1998-2002) आशिल्ले. गोंयांत जाल्ल्या 16व्या अखिल भारतीय कोंकणी साहित्य संमेलनाचे ते अध्यक्ष आशिल्ले.

5 जून 2009 दिसा ते संवसाराक अंतरले.

• ग्रंथ सुची –
• कोंकणी
• श्रद्धांजली (1983 – संपादीत)
• कोंकणी म्हण्यां सोरू (1985 – जोड संपादन)
• लिपि एक शास्त्रीय चिंतन (1986)
• एक अवतारिका भगवद्गीतेक (1987)
• श्रवोण (1996)
• कोंकणी बरयतना (2001)
• पवळीं (2003)
• ओळख (2011 – मरणा उपरांत)

• मलयाळम
• मैला आंचल (अणकार)
• साहित्य मर्मम् (अणकार)
• पंञियुम् नुलुम् (अणकार)
• डिटेक्टीव ड्यूपिन (अणकार)
• चंद्र कांती (अणकार)
• मारुन्न समूहत्तिनावश्यमाया शाश्वतमूल्यंगळ (अणकार)
• संध्यावंदनादी (1987)
• कुलदेवता प्रणामम् (1994 – जोड लेखक)

Contributed by Sneha Sabnis

#PGKamath #biodata #information #Konkani #writer