मीना काकोडकार – Meena Kakodkar
मीना सुरेश काकोडकार हांचो जल्म 21 सप्टेंबर 1944 दिसा काणकोणच्या पाळोळें गांवांत गायतोंडे कुटुंबांत जालो.
कोंकणी भाशेंतली एक सर्जनशील लेखिका आनी अनुवादक म्हणून तांची खाशेली वळख आसा. बालसाहित्यांत तांणी आपलो खास जागो निर्माण केला.
मुंबयच्या विल्सन म्हाविद्यालयांतल्यान तांणी बॅचलर ऑफ सायन्स ही पदवी मेळयल्या. तशेंच कला क्षेत्रांत तांकां खूब आवड आशिल्ली, म्हणून तांणी दोन वर्सांचो खास प्रशिक्षण अभ्यासक्रम पुराय केला.
गोंय सरकाराच्या लेखा संचालनालयांत त्यो जोड लेखा संचालक म्हणून वावुरताली.
तांणी 13 बालकथांचीं पुस्तकां, 3 बालनाट्यांचीं पुस्तकां, 4 लघुकथा संग्रह, दोन कादंबर्यो आनी एक निबंधसंग्रह बरयला. तांच्यो कथा हिन्दी, मराठी, कन्नड, ओडिया, मल्याळम, तमीळ, इंग्लीश अश्या भाशांनी अनुवादीत जाल्यात.
गोवा कला अकादमीच्या कोंकणी नाट्य सर्तींनी ती सातत्यान वांटो घेताली. तांकां जायतीं इनामांय फावो जाल्यांत.
साहित्य अकादेमीचे दोन पुरस्कार तांकां फावो जाल्यात. साहित्य आनी अणकार हे दोन पुरस्कार तांकां लाभल्यात. कोंकणी साहित्या खातीर साहित्य अकादेमी पुरस्कार जोडपी त्यो पयली बायल लेखिका.
तांकां वट्ट 20 पुरस्कारांनी सन्मानीत केला. कुळागर पुरस्कार, कथा पुरस्कार, कला अकादमीचो रंग सन्मान पुरस्कार, यशोदामिनी पुरस्कार, वात्सल्य पुरस्कार, कोंकणी भाशा मंडळाचो साहित्य पुरस्कार, गोंय राज्य पुरस्कार, जनगंगा पुरस्कार, राजभाशा संचालनालयाचो ज्ञानपीठकार रवीन्द्र केळेकार कोंकणी भाशा पुरस्कार, विश्व कोंकणी केंद्राचो विमला पै पुरस्कार ह्या प्रतिश्ठीत पुरस्कारांचो तातूंत आसपाव आसा.
20व्या अखिल भारतीय साहित्य संमेलनाचें अध्यक्षपद तांकां फावो जाल्लें.
हे भायर, तांकां प्राण्यांचेर खूब मोग आसलो. गोवा एनिमल वॅल्फॅर ट्रस्टाच्यो त्यो विश्वस्त आशिल्ल्यो.
8 नोव्हेंबर 2024 दिसा तांकां मडगांवां मरण आयलें. तांची पिराय 80 वर्सांची आशिल्ली.
- ग्रंथ सुची-
- कथा
- दोंगर चंवल्लां
- सपन फुलां
- आमी
- अक्षर कोमाले (मरणा उपरांत प्रकाशीत)
- बालनाट्य
- साळकांतलो जादुगार
- कादंबरी
- वास्तू
- अणकार
- सांवळ्यां रेगो (कादंबरी)
- निबंध
- शब्दसूर