दामोदर मावजो – Damodar Mauzo

दामोदर मावजो हांचो जल्म 1 ऑगस्ट 1944 दिसा, दक्षीण गोंयच्या साश्टी म्हालांतल्या माजोड्डें गांवांतल्या जालो. तांकां आदाराचे भावनेन भाई मावजो म्हूण पाचारतात. तांच्या बापायचें नांव यशवंत आनी आवयचें नांव लक्ष्मी.

भाई मावज्याचें मुळावें शिक्षण मराठी, पुर्तुगेज आनी इंग्लीश भासांनी जालें. उपरांत मुंबयच्या पोद्दार महाविद्यालयांतल्यान तांणी वाणिज्य शाखेची पदवी मेळयली.

ते एक कथाकार आनी कादंबरीकार पूण स्वताक कथाकार म्हणप तांकां चड भावता. मुंबय आसतना आंतर महाविद्यालयीन नाटक सर्तींत नाटकां बरोवन तशेंच तातूंत वांटो घेवन आपले साहित्यीक जिणेक दामोदर मावज्यान सुरवात केली.

तांची तूं वचूं नाका ही पयली कथा 1963 वर्सा गुरुनाथबाब केळेकार हांच्या नवें गोंय नेमाळ्यांतल्यान उजवाडाक आयली. त्या उपरांत तांचे जायते कथा संग्रह उजवाडाक आयले.

कादंबरी प्रकाराक हात घालचे पयलीं तांणी सूड ही नवलिका बरोवन 1975 वर्सा प्रकाशीत केली. उपरांत तांचे कार्मेलीन आनी हेर दर्जेदार कादंबर्‍यांनी कोंकणी कादंबरेक एक उंचेलो पांवडो मेळोवन दिलो. तांची कार्मेलीन ही कादंबरी कमीत कमी 12 भाशांनी अणकारीत जाल्या. तशेंच तांच्या चडश्या कथा संग्रह आनी कादंबर्‍यांचो इंग्लिश, हिंदी आनी हेर भाशांनी अणकार जाला. गोंयच्या इतिहासीक जनमत कौलांत आनी गोंयच्या विलिनीकरणा आड वावुरपांत तांचो वांटो आसलो. तशेंच कोंकणी प्रजेचो आवाज हे चळवळींत ते कृतीशील वांगडी आसले.

• ग्रंथ सुची-
• कथा
• गांथन (1971)
• जागरणां (1975)
• रुमडफूल (1989)
• भुरगीं म्हगेलीं तीं (2001)
• सपन मोगी (2001)
• तिश्ठावणी (2020)
• पोस्ट कोवीड (2024)
• पोन्नो बाजार (2024)
• पंचखादाय (2025)
• नवलिका, कांदबरी
• सूड (1975)
• कार्मेलीन (1981)
• सुनामी सायमन (2009)
• जीव दिवं काय च्या मारूं (2020)
• बालसाहित्य
• एक आशिल्लो बाबुलो
• काणी एका खोमसाची
• चितरंगी
• व्यक्तीचित्रण
• अशे घडले शणै गोंयबाब
• उंच हावेस उंच माथें
• समिक्षण
• मावज्याले कसवटेर
• आपरोस
• स्क्रीन प्ले आनी पटकथा
• शिटू
• अलिशा
• सूड
• ओ मारिया
• एनेमी
• दिसाळ्यां खातीर वावर
• सुनापरान्त
• दैनीक वर्तमानपत्र