नमस्कार,

फाल्यां सर्गेस्त कवी बाकीबाब बोरकार हांची जयंती, तांचे यादींत तांचें हें कवन:

गोंय आमचें मूळ पीठ, कोंकणी आमची भास, कोंकणी संस्कृताय, आमच्या जाणट्यांची मिरास.

कोंकणी आमची भास कोंकणी आमचो स्वास कोंकणी आमचो ध्यास.

माचये वयले मानेस्त आनी मुखार जमिल्ल्या म्हज्या कोंकणी भावांनो आनी भयणींनो.

संवसारांतल्यो सगळ्यो प्रगत भाशा पळयत जाल्यार आमकां ते भाशेचे लोक आपल्या प्रशासनांत तिचो वापर करतात हें दिसून येतलें. हाचो लाव ते-ते भाशेची उदरगत जावपाकूय जाला.

इतिहास काडून पळयत जाल्यार आमकां दिसून येतलें की दर राज्यकर्त्यान आपलें राज्य हें आपले भाशेंतूच चलयलें. पूण कोंकणी भाशेच्या आनी कोंकणी भाशीक आशिल्ल्या लोकांक स्वताचेर राज्य करपाची संद हाचे आदीं केन्नाच मेळूंक ना, आज ती संद आमकां मेळ्ळ्या आनी तिचें भांगर करप हें आमचें कर्तव्य. 

आयची ही कार्यावळ फकत कार्यावळ नासून एक क्रांतीची सुरवात आसा, क्रांती कसली? तर क्रांती मेळिल्ल्या स्वराज्याचें भंगार करपाची. कोंकणी भाशा आनी कोंकणी मनशांचीं पांयामुळां हे भुंयेंत प्रशासनाच्या मार्फत घट करपाची, ताचें पयलें पावल जागृताय. आनी तेच खातीर आमी कार्यावळीच्या नांवांत लेगीत ‘जागृताय’ हें उतर वापरलां.

अशा ह्या कार्याची जबाबदारी जेन्ना आमी आंगार घेवन, हें सगलें घडोवन हाडटात तेन्ना अनेक व्यक्तींचो तशेंच संस्थांचो हातभार ताका लागता. आयोजक आनी संयोजक ह्या नात्यान तांचे उपकार मानप ही म्हजी जबाबदारी थारता. 

प्रशासनांत कोंकणी भाशेचो वापर – जागृती कार्यावळ आमी म्हणजेच युवा पणजीन राजभाशा संचालनालय, गोंय सरकार हांच्या जोड पालवान घडोवन हाडल्या आनी तांचे कडल्यान मेळिल्ल्या अर्थीक आनी तांत्रीक पालवा खातीर आमी तांचे भोव उपकारी आसात.

आयचे कार्यावळी खातीर भौ. दोतोर पद्मनाभ राताबोली हे आमच्या आपोवण्याक मान दिवन मुखेल सोयरे म्हण आयले आनी‌ आमकां आपल्या प्रभावी उतरांनी संबोधीत केलें, ताचे खातीर मनाचे खोलायेंतल्यान तांचे आमी उपकार मानतात.

राजभाशा संचालनालयाचे संचालक भौ. प्रशांतबाब शिरोडकार हांचे आमी तांणी दिल्ल्या सहकार्य आनी मार्गदर्शना खातीर भोव‌ उपकारी आसात. तशेच उपसंचालक भौ. अनिलबाब सावंत हांचे कडल्यान योग्य ते दिकेन मुखार सरपा खातीर आमकां बरोच आदार मेळ्ळा, तांचेय आमी उपकारी आसात.

‘आमची मायभास सांबाळपाची जबाबदारी आमचीच’ असो संस्कार ल्हान पिरायेचेरूच जावचो हे नदरे मुखार दवरून मुष्टिफंड माध्यमीक शाळेन तांच्या माणकुल्या विद्यार्थ्यांक हे कार्यावळीक धाडले ते खातीर आमी शाळेची मुख्याध्यापक अपर्णाबाय च्यारी तशेंच हांगा हजर आशिल्ली उपमुख्याध्यापक बिनाबाय शंखवाळकार हांचे मनां-काळजांतल्यान उपकार.

धेंपे कला आनी विज्ञान म्हाविद्यालय, मिरामाराची शिक्षक अंजूबाय साखरदांडे, तशेंच शिक्षक गौरांगबाब भांडिये आनी साबार विद्यार्थी हांणी कार्यावळीच्या आयोजनांत केल्ल्या आदारा खातीर आमी तांचे तशेंच तांच्या प्राचार्याचे कळजांतल्यान उपकार मानतात.

हे कार्यावळीक आमकां लाभल्यात ते सगळे नामनेचे वक्ते, तशेंच हांगा मायभाशेच्या मोगान जमिल्ले तुमी सगले जे वांटेकारी जाल्यात – तुमचे सगल्यांचेच हांव युवाचे वतीन उपकार मानतां.

हे कार्यावळीक तुमी सगळे मोटे संख्येन हाजीर रावचे आनी कार्यावळीचो लाव घेतलो म्हणून तुमचे सगळ्यांचे देव बरें करूं.

‌त्या भायर आमचे कार्यावळीक जांणी प्रसिद्धी दिली अश्या सगल्या माध्यमांचे, ताच्या पत्रकारांचे आनी संपादकांक खूब खूब दिनवास.

शेवटाक युवा पणजीचे म्हजे सहकारी तशेच वांगडी जे प्रत्यक्ष वा अप्रत्यक्ष रुपांत ही कार्यावळ येसस्वी जावची म्हण वावुरल्यात आनी वावुरतात ताचे सगळ्यांचेच संयोजक ह्या नात्यांत हांव मनांतल्यान उपकार मानतां. 

कोणाचेंय जर नांव घेवपाचें उरलें आसत जाल्यार तुमी व्हड मनान म्हाका माफ करतले अशी आस्त बाळगितां.

आनी सोंपोवचे आदीं इतलेंच म्हणटां

कोंकणी उलोवया

कोंकणी बरोवया

कोंकणींतल्यान प्रशासन चलोवन दाखोवया. तुमचे सगळ्यांचे खूब खूब देव बरें करूं.

जय कोंकणी! जय गोंय! जय हिंद!

CONTRIBUTED BY SANATH BHARNE