अशें म्हणटात

कानांतल्यान आयकल्यार फकत उतरांचो आवाज येता

मनांतल्यान आयकल्यार उतरांचो अर्थ समजता

तेच खातीर, आयज आमी दोळ्यांतल्यान अक्षररूप पळोवया, तोंडांतल्यान वाचुया, कानांतल्यान आयकुया आनी मनांतल्यान समजून घेवया.

नमस्कार हांव गोविंद मोपकार. कोंकणी साहित्याच्या मळार कविता, लेख आनी अणकार पुस्तकांच्या लोकार्पण सुवाळ्याक जमिल्ल्या सगळ्यांक संजना पब्लिकेशन्साचे वतीन काळीज भरून येवकार दिता.

विनवणी करतां, संजना पब्लिकेशन्साचे दिनेश मणेरकार हांचे लागीं, तांणी मानेस्तांक वेदीर हाडून तांची बसका फावो करून दिवची.

ह्या समयार आमचे मदीं आसात मुखेल सोयरे ह्या नात्यान भौ. शैलेंद्र मेहता, अक्षरमुर्ती भौ. अशोक कामत, भौ. तुकाराम शेट आनी भौ. रमेश शंखवाळकार.

ताळयांनी आमी तांकां येवकार दिवया.

ह्या समयार हांव विनवणी करतां, दिनेश मणेरकार हांचे कडेन तांणी येवकाराचें उलोवप करचें.

देव बरें करूं दिनेशबाब.

मोगाळ इश्टांनो, माचये वयल्या मानेस्तांनी आपल्या कार्यांतल्यान आपली वळख दिल्ली आसा. तरी लेगीत तांचे कार्यनिश्ठेची आनी अक्षरसंपत्तेची पावती म्हणून तांचो थोडोचो परिचय करपाचें धाडस हांव हांगासर करतां.

(मानेस्तांची वळख)

हांव ह्या समयाचेर स्नेहाबाय सबनीस हांचे लागीं विनवणी करतां, तांणी फुलांनी आयच्या मुखेल सोयर्‍याक येवकार दिवचो.

कार्यावळ मुखार व्हरतना, ज्येश्ठ लेखक भौ. तुकाराम शेट हांचे लागीं मागतां, तांणी चिंतपाक फुलां आनी महानगर पुस्तकांच्या प्रकाशन सुवाळ्या वेळार आपलें मनोगत व्यक्त करचें.

देव बरें करूं सर. तुमच्या कवितांचें वाचन आमी प्रेक्षक करतले आनी तुमचें लेखन आमकां दीत रावचें आनी आमी तें वाचून पचयत रावतले.

मुखार वळटा आसतना, ह्या समयाचेर आवाज स्वासाचो पुस्तकाचे लेखक ज्येश्ठ म्हालगडे भौ. अशोकबाब कामत हांगासर आपलें मनोगत मांडटात.

देव बरें करूं अशोकबाब.

इश्टांनो, कोंकणीच्या इतिहासांत पळयल्यार र. वि. पंडित आमकां मेळटात, जांणी एकाच वेळार कितलीशींच पुस्तकां काडलीं. ते हालींसराकूच तन्वी कामत बांबोळकार हांचो असोच एक योगायोग. तांणी कितलीशींच पुस्तकां काडलीं. हांगासर असोच एक सुयोग घडटा पूण वेगळे पद्दतीन, जंय वेगळे वेगळे लेखक आपलीं पुस्तकां दितात आनी प्रकाशीत जातात.

आतां वेळ आयला, मनोगता फाटलें अक्षरधन लोकार्पीत करपाचें. मागतां कार्यावळीचे मुखेल सोयरे अक्षरपारखी भौ. शैलेंद्रबाब मेहता आनी माचये वयल्या सगळ्या मानेस्तां लागीं, तांणी संजना पब्लिकेशन्सान उजवाडायल्लीं कोंकणी साहित्याच्या मळा वयली कविता, लेख आनी अणकाराचीं पुस्तकां लोकर्पीत करची.

मानेस्तांक देव बरें करूं.

इश्टांनो, चिंतपाक फुलां आनी The story of Opinion Poll हीं पुस्तकां ज्येश्ठ लेखक आनी संघटक भौ. नागेशबाब करमली हांकां ओंपल्या. ह्या समयाचेर तांचे पूत श्री. रामदासबाब करमली हांगासर हीं पुस्तकां तांचे वतीन स्विकारता. विनवणी करतां, श्री. रामदासबाब करमली हांचे लागीं, तांणी माचयेर येवन हीं पुस्तकां स्विकारचीं.

देव बरें करूं.

ह्या समयाचेर आमी दरेका पुस्तकाचें मुखपृश्ट सजोवपी कलाकारांक पुस्तकाची प्रत भेटयतात. तुमचे कडेन नमळायेची विनवणी आसा उपकार करून सभाघरांत आसात जाल्यार तुमी तुमची प्रत स्विकारची. भौ. श्रीधर कामत बांबोळकार, भौ. कलानंद बांबोळकार, भौ. हर्षदा केरकार, भौ. संकेत लवंदे. तेच बरोबर पुस्तकाची मांडावळ करपी भौ. ह्रषिकेश आठवले हांकां आमी पुस्तकाची प्रत भेटयता.

सगळ्यांक चडांत चड देव बरें करूं.

ह्या वेळार गिन्यानाची तेंगशी गांठपाक आमकां प्रवृत्त करपी लेखक, आलोचक, अभ्यासक, आयच्या सुवाळ्याचे मुखेल सोयरे, जांकां हांव अक्षरपारखी म्हणून संबोधीत करतां, ते भौ. शैलेंद्रबाब मेहता सर. हांकां हांव आपलें भांडवल आमचे मुखार मांडपाक आमंत्रीत करतां.

देव बरें करूं सर. सर फकत अक्षरपारखीच न्हय साक्षरपारखी अशें म्हणपाक पसंत करतलों. चडांत चड देव बरें करूं.

इश्टांनो आमची याद मानेस्तांच्या मना-काळजांत खोल खोल उरची म्हणून ह्या समयाचेर आमी यादस्तीक तांकां भेटयतात. विनवणी करतां, दिनेशबाब मणेरकार हांचे लागीं तांणी ही यादस्तीक भेट भेटोवची.

पयले सुवातेर भौ. शैलेंद्रबाब मेहता, भौ. अशोकबाब कामत, भौ. तुकारामबाब शेट, आनी भौ. रमेशबाब शंखवाळकार.

देव बरें करूं सर.

उपकाराचीं दोनूच उतरां पूण उपकार मात खोल खोल काळजांतल्यान

मुखेल सोयरे, अक्षरमुर्ती, घरचीं तुमी, साहित्य मोगी, सगळीं सगळीं

दिनवास अंतरमनांतल्यान

इतलेंच म्हणून उपकाराचें उलोवप सोंपयतां.

सगळ्यांक देव बरें करूं.

आयची कार्यावळ हांगाच सोंपली अशें जाहीर करतां आनी तुमची रजा घेतां.

(व्हिडियो लिंक – https://www.youtube.com/watch?v=il3W5QmC7pQ)

Contributed by Govind Mopkar

#anchor #script #konkani #book #release #function #sample