लेखिकेची वळख

शीला कोळंबकार हाचें आदलें नांव शीला मर्तो नायक. तशेंच ताचो जल्म 11 मार्च 1945 ह्या दिसा पणजे (तिसवाडी) जालो. तिचो सध्याचो राबितो मुंबय आसा. तांचें शिक्षण बी. ए. आनर्स (मुंबय विद्यापीठ) मेरेन जालां.

कोंकणी मळार एक नामनेच्यो लेखिका म्हूण तांची नामना आसा. तांणी जायतीं पुस्तकां बरयल्यांत. तशेंच मुंबय आकाशवाणीचेर तांचें साहित्य नेमान प्रसारीत जालां. पणजे आकाशवाणीवेल्यानूय तांच्यो कथा आनी नाटकुलीं प्रसारीत जाल्यांत. तांणी कांय भाशेंतल्या पुस्तकांचो अणकार केला. तेलगू, मराठी, हिन्दी, बंगाली, इंग्लीश, पुर्तुगेज आनी फ्रँच भाशेंतल्यो कथा तांणी अणकारीत केल्यात. तशेंच तांच्या कथेंचो अणकार इंग्लीश भाशेंत जाला. नामनेचे साहित्यीक आनी अनुवादक प्रकाश थळी तशेंच मुकेश थळी हांणी तांच्यो कथा इंग्लीशींत अणकारीत केल्यात.

तांचीं प्रकाशीत जाल्ली पुस्तकां म्हणल्यार –

ओली सांज (कथासंग्रह) जाग प्रकाशन,1973

गेर्र (कथासंग्रह), 2007

भुंयचाफीं (निबंद झेलो – व्यक्तीचित्रणां) जाग प्रकशन, 1994

कथाशिल्प (कथासंग्रह) गोवा कोंकणी अकादेमी, 2007

तांचीं कांय बाल साहित्याचीं पुस्तकां प्रकाशीत जाल्यांत. तीं म्हणल्यार –

तेजस आनी  ओजस – राजहंस वितरण, 1996 – 1998

पंकज – भूमी प्रकाशन, 2005

तांणी अणकारीत केल्लीं पुस्तकां अशीं आसात –

दोंगरावेलो उजो (इंग्लीश) साहित्य अकादेमी

परजळती धोल (बांगाली) नॅशनल बुक ट्रस्ट, नवी दिल्ली 1996

भांगराचें सुकणें (डोगरी) साहित्य अकादमी, नवी दिल्ली 2004

पुरस्कार

ओली सांज ह्या कथा संग्रहा खातीर गोवा कला अकादमी, राज्य पुरस्कार, 1975.

भुंयचाफीं पुस्तका खातीर साहित्य अकादेमी पुरस्कार, 1997

भांगराचें सुकणें ह्या अणकारीत पुस्तका खातीर साहित्य अकादेमी अणकार पुरस्कार, 2007

विमला वि. पै विश्व कोंकणी साहित्य पुरस्कार, 2014

कोंकणी खातीर योगदान

शीला कोळंबकार हांणी कोंकणींत जायत्यो कथा बरयल्यात. 1973 वर्सा ओली सांज हो तांचो पयलो कथाझेलो उजवाडाक आयलो. मॅगी कथेंत मॅगीच्या व्यक्तीचित्रणा खातीर तांकां चड नामना फावो जाली. ते उपरांत विसा परस चड वर्सांनी तांचो दुसरो कथा संग्रह उजवाडाक आयलो. भुंयचाफीं ह्या पुस्तकांत व्यक्तीचित्रणां आसात.

तांच्यो कथा वा लेख सगले अणभवाच्या आदाराचेर बरयल्यात. तांणी ल्हानपणांतल्यान घेतिल्ले वेगवेगळे अणभव सांठयत, त्यो कथेच्या रुपान वाचकां मुखार दवरल्यात. मनशाचो सभाव, सामान्य मनशाचे जिणेंत घडिल्ले वेगवेगळे प्रसंग तांच्या कथांनी ठळकपणान दिसतात.

भुंयचाफीं कथासंग्रह

भुंयचाफीं कथासंग्रहाचें प्रकाशन 1994 वर्सा जालें. भुंयचाफींतल्या वेगवेगळ्या व्यक्तींचीं चित्रां आमच्या दोळ्यां मुखार उबी करपी निवेदिका, भुंयचाफींतले हांव आनी लौकीक जगांतलें शीला कोळंबकार हें नांव धारण करपी बायल ह्यो दोनूय एकूच आसात. तांची वेगळी वळख ना.

भुंयचाफीं पुस्तकांतलीं कांय पात्रां लेगीत गरजेची आसात. विशाल, आंजेल, पुरसो, अत्रामामी आनी मुळये अशीं पात्रां वाचकांक वाचूंक मेळटात. अशे बारीकसाणेन केल्ला चित्रणाक लागून ती ती व्यक्ती वाचप्याच्या दोळ्यां मुखार जिवीत रुपांत उबी रावता आनी तें व्यक्तीचित्र यश जोडपाचे दिशेन पयलो पांवडो हुंपून फुडें वता. लेखिकेची लिखाण शैली सामकी सादी आसा. तिच्यांत एक निजाचेंच व्हांवतेंपण आसा. तिका अलंकरणाचो हावेस ना.

जाग दिवाळी अंक, कोंकणी दिवाळी अंक, कुळागर दिवाळी अंक आनी चित्रंगी दिवाळी अंक ह्या अंकांनी तांच्यो कथा आनी निबंद छापून आयल्यात.

शीला कोळंबकार हांणी कथा, ललीत लेख तशेंच बाल साहित्यांत आपली खाशेली सुवात तयार केल्या. तांचें लिखाण म्हणल्यार कोंकणी साहित्यांतले शीला लेख अशें म्हणूं येता. शीला कोळंबकार हांणी कोंकणी भाशेच्या मळार आनी खास करून कथा ह्या साहित्य प्रकारांत म्हत्वाचें योगदान दिवन कोंकणी भाशेचो दर्जो आनीक ऊंच व्हेलो.

करिश्मा कृष्णा ताटे (विद्यार्थी)

#Sheela_Kolambkar #Information #Biodata #Essay #Goa #Educational