हेमा नायक – Hema Naik
हेमा नायक हांचो जल्म 5 मे 1952 दिसा मडगांवां जालो. तांणी अर्थशास्त्र ह्या विशय पदवी मेळयल्या. कोंकणी कार्यकर्ता, कादंबरीकार, प्रकाशक, संघटक आनी अनुवादक म्हणून तांची नामना आसा.
ल्हान पिराये सावनूच हेमा नायक (धुमटकर) हांणी कोंकणी चळवळींत वांटो घेतलो. कोंकणी बायलां एकठांय करूंक आनी तांकां साहित्य बरोवंक प्रोत्साहन दिवंक तांणी चित्रंगी मेळावे आयोजीत केले आनी चित्रंगी अंक काडले. 1973 वर्सा कोलकातांत जाल्ल्या संवसारीक बायल परिशदेंत तांकां बायलांचे प्रस्न आनी संघर्श साहित्यांतल्यान मांडपाची प्रेरणा मेळ्ळी.
अपुरबाय प्रकाशन ही प्रकाशन संस्था तांणी साबार वर्सां चलयलीं. हे प्रकाशन संस्थे अंतर्गत तांणी 100 परस चड पुस्तकां प्रकाशीत केल्यांत. गोंयांत कोंकणी फिल्मांची संस्कृताय फळची म्हणून तांणी साबार फिल्मांच्या निर्मिती खातीर आदार दिलो.
कोंकणी प्रजेचो आवाज ह्या बावट्या खाला तांणी कोंकणी राजभास आंदोलनांत सक्रीय वांटो घेतलो.
कर्नाटकांतल्या मंगळुरांत जाल्ल्या 25 व्या अखिल भारतीय कोंकणी साहित्य संमेलनाची ती अध्यक्ष आशिल्ली.
भोगदंड हे कादंबरे खातीर तांकां केंद्रीय साहित्य अकादेमीचो पुरस्कार फावो जाला. तशेंच कोंकणी भाशा मंडळ गोंयचो साहित्य पुरस्कार, कला अकादमी राज्य साहित्य पुरस्कार, डॉ. टी.एम.ए. पै साहित्य पुरस्कार, यशोदामिनी पुरस्कार, कला आनी संस्कृती पुरस्कार अशें साबार पुरस्कार फावो जाल्यात. 2013 वर्सा तांकां साहित्य अकादेमीचो अणकार पुरस्कार फावो जालो.
- ग्रंथ सुची
- कादंबरी
- निर्बळा आनी मुक्ती (1992)
- भोगदंड (1997)
- कथा
- पसय (1982)
- दुर्गावतार (2009)
- निबंद
- अस्तुरी मृग (1992)
- एकांकी
- भायली गोडी (1984)
- अणकार
- मिता आनी जादूचे मोचे (1996)
- ताठ कणो (2006)
- कालि-कथा: व्हाया बायपास (2008)
- हांव असो घडलो (2012)
- आमचो बाप आनी आमी (2012)
- संपादन
- अप्रूप
- सहजीवन
Contributed by Sneha Sabnis