डॉ. जयंती नायक – Dr. Jayanti Naik
डॉ. जयंती नायक हांचो जल्म 6 ऑगस्ट 1962 दिसा गोंयच्या केपें गांवांत जालो. समाजशास्त्र विशयांत एम. ए. (मैसूर विद्यापीठ), लोक-साहित्य विशयांत पदव्युत्तर पदविका (मैसूर विद्यापीठ) आनी लोकसाहित्य विशयांत पीएच.डी. (गोंय विद्यापीठ) पदवी प्राप्त केल्या. गोंय विद्यापिठांतल्यान कोंकणी विभागांतल्यान पीएच.डी. मेळोवपी ती पयली व्यक्ती. फाटल्या तीन दसकां सावन तांणी लोकसाहित्यांत खूब मोलादीक संकलन आनी संशोधन केलां. तांच्या नांवार सुमार 43 पुस्तकां आसात. तातूंत कथा, नाटक, बालसाहित्य, व्यक्तीचित्रां, निबंद, कविता, लोकसाहित्य ह्या विशयांचो आसपाव आसा.
गोवा कोंकणी अकादेमीचो लोकवेद विभाग ती सांबाळटाली. कोंकणी लोकवेदाचो सांबाळ आनी संकलन करपाचें काम तिणें नेटान केलें. 2022 वर्सा ती सेवानिवृत्त जाली. लोकवेदाच्या मळार तांचीं सुमार 17 पुस्तकां आसा. तांच्या साहित्य प्रवासाक गर्जन ह्या कथा संग्रहांतल्यान सुरवात जाली. ताचे उपरांत तांणी नाटक, बालसाहित्य रचलें आनी हिंदी साहित्याचो अणकार केलो. तांच्या साहित्यांत ग्रामीण जीण, बायलांचे संघर्श तशेंच लोकवेद मोट्या प्रमाणांत दिसता.
केपेंतल्या आमोणें ह्या गांवाचेर संशोधन करून तांणी आमोणें एक लोकजीण हें पुस्तक काडलें. आमोणें गांवची माहिती तशेंच थंयची लोकजीण आनी लोकसाहित्याचेर ह्या पुस्तकांत भर दिल्या.
गोवा कोंकणी अकादेमीच्या अनन्य ह्या साहित्य-संशोधन पत्रिकेची ती संपादक आशिल्ली. आतां ती इन्स्टिट्यूट मिनेझीस ब्रागांझाच्या गोवापुरी हे पत्रिकेचें संपादन करता.
डॉ. जयंती नायक हांच्या लोकांकाणयांचो हिंदी आनी इंग्लीश भाशेंत अणकार जाला. तशेंच तांच्या कथांचो ‘द सॉल्ट ऑफ द अर्थ’ ह्या नांवान इंग्लीश भाशेंत अणकार जाला. तशेंच ‘जयंतीची कथा: आस्वाद आनी समिक्षा’ ह्या नांवान समिक्षेचें संकलन पुस्तक प्रकाशीत जाला.
कोंकणी भाशा मंडळाचो साहित्य पुरस्कार (1989), जनवाहिनी मांडसोभाण लोकवेद पुरस्कार (1998), डॉ. टी. एम. ए. पै. फावंडेशनाचो उत्कृश्ट कोंकणी पुस्तक पुरस्कार (2000), कला अकादमीचो साहित्य पुरस्कार (2002), साहित्य अकादेमीचो पुरस्कार (2004), कला आनी संस्कृती संचालनालयाचें गोंय राज्य सन्मान (2007), यशोदामिनी पुरस्कार (2009), साहित्य अकादेमीचो अणकार पुरस्कार (2020) अशे जायते पुरस्कार डॉ. जयंती नायक हांकां फावो जाल्यात.
- ग्रंथ सुची
- गर्जन (कथा संग्रह – 1989) (दुसरी आवृत्ती 2009)
- रथा तुज्यो घुडयो (लोकवेद – 1992)
- कणेर खुंटी नारी (लोकवेद – 1993)
- मानालीं गीतां (लोकवेद – 1993)
- तळय उखल्ली खेळयांनी (लोकवेद – 1993)
- आमोणें – एक लोकजीण (लोकवेद – 1993)
- पेडणेचो दसरो (लोकवेद – 1995)
- नागशेराचे सूर (लोकवेद – 1996)
- लोकबिंब (लोकवेद – 1998)
- सोरपाची करामत (बालकादंबरीचो अणकार – 1998)
- कोंकणी लोककाणयो (लोकवेद – 2000)
- चडशाण्यांक फातराचें शीत (बालसाहित्य – 2001)
- अथांग (कथा संग्रह – 2002)
- वागमामाची फजिती (बालसाहित्य – 2002)
- नवरंगी फूल (बालसाहित्य – 2002)
- भुरग्यांखातीर लोककाणयो (बालसाहित्य – 2002)
- कर्लेची बनवड (लोकवेद – 2002)
- सानुल्यांचीं कवनुलां (बालसाहित्य – 2004)
- गोंयची लोककला (बालसाहित्य – 2004)
- गांवरान (लोकवेद – 2005)
- राजरत्नां (लोकवेद – 2005)
- लोकरंग (लोकवेद – 2008)
- लोकमंथन (लोकवेद – 2008)
- वेंचीक लोककाणयो (लोकवेद – 2008)
- कुकमादेवीची दिपमाळ (नाटक – 2009)
- मिर्गवेणो (कविता संग्रह – 2010)
- विसर्जन (नाटकाचो अणकार – 2012)
- देशांतरींच्यो लोककथा – भाग 1 (लोकवेद – 2013)
- काळमाया (नाटक – 2014)
- जिन्दगीनामा (कादंबरीचो अणकार – 2015)
- म्हजी माती, म्हजीं मनशां (व्यक्तीचित्र – 2015)
- देशांतरीच्यो लोककथा – भाग 2 (लोकवेद – 2017)
- देशांतरीच्यो लोककथा – भाग 3 (लोकवेद – 2017)
- मायेची व्यथा (वेंचीक कथा – 2017)
- आर्त (कथा संग्रह – 2019)
- गूढबंध (लोकवेद – 2019)
- तिची काणी (कथा संग्रह – 2020)
- लोकवेद: रंग आनी रूप (लोकवेद निबंद – 2025)
- बळी (अणकार – नाटक – 2026)
- संकलन आनी संपादन
- गोवा कोंकणी अकादेमीचीं 25 वर्सां
- अखिल भारतीय कोंकणी साहित्य संमेलनाचीं अध्यक्षीय भाशणां (2016)
- अखिल भारतीय कोंकणी परिशदेच्या अध्यक्षांचीं भाशणां (2016)
- संजीव – सचीत
- अनन्य (गोवा कोंकणी अकादेमी)
- गोवापुरी (इन्स्टिट्यूट मिनेझीस ब्रागांझा)
Contributed by Sneha Sabnis
#Konkani #writer #biodata #information #JayantiNaik